+19 °С
Облачно
Мәғлүмәт
30 Июля , 03:00
Моҡастар изге эш башлаған
Баймаҡ районының Беренсе Моҡас ауылы ир-егеттәре зыяратты кәртәләү эшенә тотонған. Әлеге мәлдә ауыл уңғандары мәңгелек йорттоң иҫке ағас ҡоймаларын заманса профнастил ҡуйыу өсөн тимер бағаналар ултыртыу менән мәшғүл. Материал һатып алыуға урында йәшәүселәр, ауылда тыуып-үҫеп, ситтә тормош көтөүсе яҡташтар аҡса йыйған. - Беренсе өмәлә кеше бик күп булманы. Шулай ҙа йәштәр менән бер рәттән тырышып эшләгән Азамат Сөләймәнов, Рәис Байғолов, Нурғәле Дилмөхәмәтовҡа, Арҡайым ҡасабаһынан Сабирйән Рәхимовҡа ҙур рәхмәт! Шулай уҡ Сибайҙан Йәнекәйев Илшат тракторы менан килеп ихлас ярҙам итте. Барығыҙға ла ҙур рәхмәт! Дөйөм эшкә индергән изге эшегеҙ үҙегеҙгә меңләтә сауап булып ҡайтһын,--ти Моҡас ауылы старостаһы Ураз Шәрипов.
Моҡастар изге эш башлаған
Ураз Нурмөхәмәт улы әйтеүенсә, ошо көндәрҙә генә ауыл халҡы ике тапҡыр өмәгә сыҡҡан. Эштәр башланып ҡына тора, шуға күрә ул ауылдаштарын, яҡташтарҙы әүҙемерек булырға саҡыра.
-Хөрмәтле ир-егеттәр! Үҙегеҙҙең эштәрегеҙҙе бер аҙ ситкә ҡуйып, өмәгә дәррәү сығыуығыҙ һорала. Күмәкләгән--яу ҡайтарған. Күптәрҙең яҡындары, туғандары ошо зыяратта ерләнгән, шуға күрә дөйөм эштән ситтә ҡалмаҫҡа саҡырам. Сауап алайыҡ! Башланған эшебеҙҙе еренә еткереп тамамлап ҡуйыу зарур. Үҙегеҙ менән кәрәкле инструменттар (бигерәк тә шөрөп борғос) алып сығыуығыҙ бурыс,--тип моҡастарҙы изге эшкә өндәне Ураз Шәрипов.
