+30 °С
Болотло
Мәғлүмәт
17 Сентябрь 2025, 05:40
Һыу мәсьәләһе хәл ителде
Башҡортостан Республикаһының торлаҡ-коммуналь хужалығы министры Ирина Голованова Баймаҡ районында һыу тәьминәте системаһын яңыртыу хаҡында белдерҙе. Подрядсы ойошма--«Үҙәк» яуаплылығы сикләнгән йәмғиәте төбәктең һыу селтәрҙәре системаһын тулыһынса яңыртҡан. Йәмғиәт белгестәре эш барышында 4 саҡрым торба алмаштырған, яңы һыу үткәргес ҡоҙоҡтар урынлаштырған, заманса насостар ҡуйған, «Ирәндек» һыу алғысын модернизациялаған. Төҙөлөш-монтаж эштәре тамамланған, системаны тикшереү һәм көйләү эштәре атҡарылған, әле ҡабул итеү процесы бара.
Һыу мәсьәләһе хәл ителде
Ирина Голованова белдереүенсә, Баймаҡ районында һыу селтәрен яҡшыртыуға йәмғеһе 28 миллион һумдан ашыу аҡса тотонолған.
-Яңы торбаларҙың яраҡлылығы 50 йылдан ашыу ваҡытҡа иҫәпләнгән. Эштәр тамамланғас уҙғарылған тикшереүҙәр һыуҙың ситкә аҡмауын күрһәтте. Эсәр һыуҙың сифаты санитар нормаларға тап килә. Иң мөһим ҡаҙаныш: бынан ары райондың 17 меңдән ашыу халҡы һыуһыҙ интекмәйәсәк,--тине Ирина Голованова.
Иҫегеҙгә төшөрәбеҙ: Баймаҡ районында һыу селтәрҙәре «Йәшәү өсөн инфраструктура» милли проектының «Коммуналь инфраструктураны модернизациялау»федераль программаһына ярашлы яңыртылды.
