Бөгөн Өфөлә Башҡортостан Башлығы Радий Хәбиров «НЕФАЗ» маркалы 37 яңы автобус асҡыстарын тапшырҙы. «Көньяҡ ҡапҡа» комплекслы төҙөлөшө» инфраструктура проекты сиктәрендә бөтәһе 898 миллион һумға газ-мотор яғыулығы менән эшләгән 70 автобус һатып алыу күҙаллана.
Ул «Башавтотранс» тың бер нисә водителенә республика Башлығының рәхмәт хатын тапшырып, уларға юлда имен-аман йөрөүҙәрен теләне. Радий Хәбиров автобустарҙың береһен ҡарап сыҡты һәм уның техник характеристикаһы менән ҡыҙыҡһынды.
Яңы автобустар Затон, Дим, Сипайлово, Инорс биҫтәләре халҡын хеҙмәтләндергән маршруттар буйынса йөрөй.