Мөхәббәткә кәртә юҡ та ул, вирус тора арала

Рәсәй Федерацияһы юстиция министрлығының коронавирустың таралыуына бәйле хәлдәрҙең тотороҡло булмауы хаҡындағы хатын тормошҡа ашырыу маҡсатында Башҡортостан Республикаһы ЗАГС бүлектәре никахтарҙы һәм айырылышыуҙарҙы дәүләт теркәүен туҡтатып тора.

--Никахҡа инергә теләүселәрҙән рәсми теркәлеүҙәрен һуңғыға ҡалдырып торорға, йәғни 2020 йылдың 1 июненән һуң өйләнешергә тәҡдим итәбеҙ, --ти Сибай ҡалаһының граждандар хәле акттарын теркәү бүлеге начальнигы А.Ә.Бохарбаева. --Апрель, май айҙарында Сибай ҡалаһы ЗАГС-ында 9 никах теркәлергә тейеш ине. Әйтергә кәрәк, май айын электән йәштәр үҙһенмәй. Әгәр ҙә никахҡа инеү мотлаҡ һәм уны бер нисек тә кисектереп тороу мөмкин түгел икән, ЗАГС-ға кейәү менән кәләш кенә килә һәм беҙ уларҙың никахын рәсми теркәйбеҙ. Ата-әсәләр, ҡунаҡтар булырға тейеш түгел.

2020 йылдың беренсе кварталында ҡала ЗАГС-ында 166 бала тыуыу, 198 кеше үлеү тураһында акт теркәлгән,83 пар никахтарын рәсмиләштергән, 59 ғаилә айырылышҡан, 7 сабыйҙы атайҙары таныған, 8 бала уллыҡҡа-ҡыҙлыҡҡа алынған, 11 кеше исемен үҙәрткән

Тыуыу, никахҡа инеү, айырылыу, баланы уллыҡҡа алыу, үлем тураһындағы ғаризаларҙы Берҙәм дәүләт һәм муниципаль хеҙмәттәр порталы аша бирергә була. Бөтә һорауҙар буйынса (834775) 5-93-57 телефонына шылтыратығыҙ.