АТАЙСАЛ
-17 °С
Болотло
Антитеррор
Бөтә яңылыҡтар
Мәғлүмәт
9 Февраль 2018, 12:53

ЯҢҒЫҘ ҠАТЫНДАРҒА ЯРҘАМ

Өфө ҡалаһында ауыр хәлгә дусар булып, меңдәрсә кешеләр янында үҙен бер кемгә лә кәрәкмәгән итеп тойған ҡатын-ҡыҙҙы йылы ҡанат аҫтына алырға әҙер йорт бар.

Өфө ҡалаһында ауыр хәлгә дусар булып, меңдәрсә кешеләр янында үҙен бер кемгә лә кәрәкмәгән итеп тойған ҡатын-ҡыҙҙы йылы ҡанат аҫтына алырға әҙер йорт бар.
«Fаилә» Республика ресурс үҙәге дәүләт бюджет учреждениеһында эшләп килгән «Әсә һәм бала» бүлексәһе тураһында һүҙебеҙ. Бында донъяла япа-яңғыҙ ҡалған, һынауҙарҙы күтәргәндә юғалып ҡалған, быуыны нығынып етмәгәнлектән бөгөлөп төшкән гүзәл заттарға дөрөҫ юлға кире ҡайтырға, тормош упҡынынан сығырға ярҙам итәләр.
Бер-бер артлы килгән ҡаты һынауҙарҙан сабыр ҡанаттары шартлап һынғанда, ғәҙеллеккә ышанысы тамам бөтөп,өмөттәре һүнгәндә шаҡыйҙар был йорт ишеген. Fаиләләге йәберләүҙәргә түҙмәй, балаларын етәкләп сығып киткән, хәсрәтле мәлдәрендә япа-яңғыҙ ҡалып, тормоштан төңөлгән ҡатындар, үҙ-үҙенә ҡул һалыр хәлгә еткән йәш ҡыҙҙар, буласаҡ әсәләр һыйыныу таба.
Бүлек етәксеһе, социаль хеҙмәткәр, юрист, психолог һәр бер ҡатын-ҡыҙ менән айырым эш алып бара. Мәҫәлән, кәрәк икән, документтары тәртипкә килтерелә, дәғүә ҡағыҙҙары, ғаризалар әҙерләнә, ойошмаларҙа, хоҡуҡ һаҡлау органдарында, судтарҙа уның мәнфәғәттәре яҡлана. Үҙенә ҡулай эш табыу, сабыйҙары булһа, уларҙы урынлаштырыу хәстәрлеген күрәләр, ҡаҡшаған һаулығын, күңелен бөтәйтеүгә көс һалалар. Тән йәрәхәттәре уңалған, йән яралары имләнгән гүзәл затҡа әкренләп кенә йәшәү ғәме ҡайта, үҙенә ышанысы нығына. Был үҙәктә ҡатын-ҡыҙҙарға ваҡытлыса йәшәү, балалары менән аралашыу өсөн яҡты йылы бүлмәләр йыһазландырылған, уңайлы шарттар тыуҙырылған. Бында улар ике айға тиклем йәшәй ала.
Ҡатын-ҡыҙҙар үҙҙәре килә алмаһа, эш көндәрендә 8 сәғәт 30 минуттан 20.00 сәғәткә тиклем 8 (347)286-02-53 телефонына, live:womendom скайбына шылтырата ала. Шулай уҡ үҙҙәре теләгән ваҡытта womendom@mail.ru адресы буйынса яҙа, www.семьярб.рф порталында белгестәргә һорауҙар ҡалдыра ала.
2017 йылда ҡатын-ҡыҙҙарға ярҙам итеү бүлегенә, ғөмүмән, ғаилә-ара мөнәсәбәттәре ҡаҡшаған, йәшәү сығанаҡтары булмаған, психологик, хоҡуҡи ярҙамға мохтаж 1792 кеше мөрәжәғәт иткән. 40 ҡатын-ҡыҙға, 50-нән ашыу балаға стационар шарттарында социаль ярҙам күрһәтелгән. Ярҙам кәрәк ҡатын-ҡыҙҙарға төп талап—тормош ауырлыҡтарын еңергә теләк булыу.
«Fаилә» республика ресурс үҙәгенең адресы: Өфө ҡалаһы, СССР-ҙың 50 йыллығы урамы, 27-се йорт, 1-се корпус.