Эшҡыуарҙар ГТО тапшырҙы

Сибай эшҡыуарҙары ҡала тормошонда әүҙем ҡатнаша. Был юлы улар “Бәләкәй һәм урта эшҡыуарлыҡ һәм шәхси эшҡыуарҙар инициативаларына ярҙам итеү” милли проектына ярашлы, спорт фестивалендә үҙ көстәрен һынап ҡараны.
Фестивалдә ҡатнашыусылар спорт ярыштарында үҙ мөмкинлектәрен күрһәтеп кенә ҡалманы, үҙ-ара тәжрибә уртаҡлашты, дуҫлыҡ ептәрен нығытты. Эшҡыуарҙар хеҙмәткә һәм оборонаға әҙерлек нормативтарын тапшырып, отжимание яһаны, ятҡан килеш кәүҙәләрен күтәрҙе, 60 һәм мең  метрға йүгереп ярышты.

Эшҡыуарҙар көнөнә арналған фестивалдән һәр кем күтәренке кәйеф, рух ныҡлығы алып таралышты. Сәләмәт йәшәү рәүешен пропагандалаған, спорт һөйөү тәрбиәләгән сара эштән бушамаған кешеләргә күңелле ял минуттары ла бүләк итте.