Туған телде, милли йолаларҙы, традицияларҙы, башҡорт ҡыҙҙары матурлығын пропагандалау, йәштәрҙе төрлө ижади эшмәкәрлеккә йәлеп итеү маҡсатында 3 декабрҙә Өфө ҡалаһында «Һылыуҡай-2020» Бөтә Рәсәй башҡорт һылыуҙары конкурсы уҙасаҡ.
Ошо уңайҙан йыл да үтеп килгән «Һылыуҡай-2020» матурлыҡ конкурсына кастинг иғлан ителде. Быйыл матурлыҡ бәйгеһе беренсе тапҡыр Бөтә Рәсәй кимәлендә үтә.
Гүзәллек бәйгеһендә кейәүгә сыҡмаған, балалары булмаған, сәләмәт йәшәү рәүеше алып барған 16-нан 25 йәшкә тиклемге ҡыҙҙар ҡатнаша ала. Уларҙың башҡорт телендә иркен һөйләшеүе, башҡорт халҡы тарихын һәм мәҙәниәтен белеү, тәбиғи матурлығы, буйы 165 сантиметрҙан да кәм булмауы мөһим.
Конкурс 3 этаптан тора. 7 ноябрь – үҙәк биләмә (Өфө ҡалаһы, Благовещен, Благовар, Бөрө, Иглин, Ҡырмыҫҡалы, Кушнаренко, Нуриман, Өфө, Шишмә, Архангель райондары).
Үткәреү урыны: Өфө ҡалаһы.
II этап – финалға һайлап алыу туры Өфө ҡалаһында 7 ноябрь көнө уҙасаҡ.
Титулға һәм тажға эйә булыусы исеме 3 декабрь Өфө ҡалаһында билдәләнәсәк. Еңеүсегә төп бүләк – автомобиль.
Ойоштороусылар: Башҡортостан Республикаһы Хөкүмәте, БР Мәҙәниәт министрлығы, Республика халыҡ ижады үҙәге, Бөтә донъя башҡорттары ҡоролтайы, MTVmix каналы.
5 октябрҙә «Һылыуҡай-2020» матурлыҡ конкурсына кастинг Сибай ҡалаһында үтте. Унда Урал аръяғының Баймаҡ, Әбйәлил, Йылайыр, Күгәрсен, Ейәнсура, Хәйбулла райондарынан сибәркәйҙәр мөмкинлектәрен һанап ҡараны.
Һөҙөмтәлә Сибай ҡалаһы Рамаҙан Өмөтбаев исемендәге башҡорт лицейының 10-сы класы уҡыусыһы Шәүрә Яхина гран-при яуланы. Шәүрә ҡаланың Халыҡ мәҙәниәте һәм ялы үҙәгендә эшләп килгән “Ете ҡыҙ” матурлыҡ һәм ҡул эштәре сәнғәте студияһында шөғөлләнә. Төбәк һылыуҡайы тажын кейгән ҡыҙ Өфөлә 7 ноябрҙә үтәсәк гүзәллек бәйгеһенең икенсе турында Сибай ҡалаһының ғына түгел, тотош Урал аръяғы намыҫын яҡлаясаҡ.
--Тамырҙарым Баймаҡ районының Түбәнге Яйыҡбай ауылындағы Хәсәновтар ғаиләһенә барып тоташа. Бөтә Рәсәй конкурстары лауреаты, ике тапҡыр Рәсәй ғаиләһе, Батыр Вәлид исемендәге премия лауреаты булып танылған Хәсәновтар ансабленҽң өсөнсө быуын вәкилҽмен,--тине Шәүрә үҙе менән таныштырып.
Жюри рәйесе, Башҡортостандың халыҡ артисы Хөрмәтулла Үтәшев ҡыҙҙың башҡортса матур һөйләшеүен, нәҫел-нәсәбен яҡшы белеүен хупланы. Яҡташыбыҙ Хөрмәтулла Ғаззали улы башҡорт һылыуҡайҙарын бөтә Рәсәй буйлап бөртөкләп йыйғандан һуң туған телдә иркен аралашҡан, халҡыбыҙҙың ғөрөф-ғәҙәттәрен, йолаларын белгән, рухлы сибәркәйҙәр тик Урал аръяғында булыуын һыҙыҡ өҫтөнә алды.