Почта бүлексәләрендә ниндәй яңылыҡтар көтөлә?

Рәсәйҙә коронавирус пандемияһы ҡурҡынысы янағас, күп ойошмалар дистанцион режимға күсерелде. Рәсәй почтаһы, федераль элемтә операторҙары булараҡ, өҙлөкһөҙ эшләүен дауам итте. Элемтә һәм бәйләнеш операторҙарының эш урындары ҡыҫҡартылманы, киреһенсә, улар тәүлек әйләнәһенә эшләргә мәжбүр булды. Рәсәй президенты В.В.Путин «Рәсәй Почтаһы» башлығы Максим Акимов менән осрашыу ваҡытында бар элемтә хеҙмәткәрҙәренә рәхмәтен белдерҙе.

“ Илдә ниндәй хәл булыуына ҡарамаҫтан: инфекция таралыуымы, һуғыш ваҡытымы төбәктәр араһында бәйләнеш булһын өсөн Рәсәй почтаһы бер туҡтауһыҙ эшләргә тейеш,”-тип билдәләне ил башлығы.

Максим Акимов белдереүенсә, почта бүлексәләрендә эшләүсе бар хеҙмәткәрҙәргә лә бирсәткә, маска, ҡулдарҙы дезинфекциялау әйберҙәре - бөтәһе 1,5 млрд. һумлыҡ һаҡланыу саралары алынған. Осрашыу барышында В.В.Путин почта бүлексәләренең хәле, яңылыҡтары тураһында һорашты. Максим Акимов тәҡдим иткән “Төбәктәрҙәге почта бүлексәләрендә социаль хеҙмәтләндереү булдырыу”, “Почта өлкәһендә коммерцияны үҫтереү ” проекттары менән танышты.

#ВВПУТИН