ГЕЛ ГЕНӘ ЙЫЛЫ ТОРМАҪ...

Башҡортостанда, Рәсәйҙең Европа биләмәһендәге кеүек үк, тиҙҙән йәнә һауа торошоноң ҡырҡа үҙгәреүе көтөлә. Төбәктәргә Баренц диңгеҙенән үтә һалҡын һауа үтеп инә башлай.

Шаршамбы 5 февралдән һауа температураһы түбәнәйә. Төндә -7,-12, аяҙытҡанда -17 градусҡаса, көндөҙ -4,-9 градус була.

6 февралдә төньяҡ райондарҙа төндә термометр бағанаһы -12,-17 градусҡа тиклем төшә, көндөҙ -5,-10 градус һалҡын булыуы көтөлә, республиканың көньяғында төндә -3,-8, көндөҙ 0,-5 градус, тип хәбәр итә Башгидромет.

Яйлап температура фоны февралгә хас күрһәткестәргә яҡынлаша.

Рәсәй Гидрометүҙәге мәғлүмәттәре буйынса, ял көндәрендә Башҡортостанда һауа температураһы көндөҙ -11, төндә -20 градусҡа тиклем түбәнәйә.