Ата-олатайҙар рухына һәйкәл булыр

Илебеҙ өсөн иҫтәлекле лә, һағышлы ла булған ОЛО юбилей яҡынлаша. Халҡыбыҙҙың Бөйөк Ватан һуғышында Еңеү яулауына 75 йыл тула. Үкенескә күрә, дәһшәтле йылдарҙың тере шаһиттары сафы һирәгәйә. Бөгөн Хәйбулла районында барлығы 4 ветеран йәшәй.

--Беҙҙең быуындың бурысы улар хаҡындағы иҫтәлектәрҙе киләһе быуынға аманат итеп еткереү. Ошо маҡсат менән Хәйбулла районында һуғыш ҡырҙарында һәләк булған, хәбәрһеҙ юғалған, яраларҙан үлгән райондаштарыбыҙ тураһында мәғлүмәт туплап хәтер китабын сығарырға ниәтләйбеҙ,--ти район хакимиәтенең мәғлүмәт-аналитика бүелеге белгесе С.А.Байгилдина.-- Был китапта алда нәшер ителгән китаптарҙағы исемлекте барлайбыҙ, төҙәтмәләр индерәбеҙ һәм төрлө сәбәптәр арҡаһында исемдәре инмәй ҡалған йәиһә хәбәрһеҙ юғалғанға һаналып, эҙләнеүҙәр һөҙөмтәһендә исеме, һәләк булған һәм күмелгән урыны асыҡланған һуғышсылар тураһында ла өҫтәмә мәғлүмәттәр индерәбеҙ.

Хәтер китабы Бөйөк Ватан һуғышында һәләк булғандар иҫтәлегенә, ата-олатайҙар рухына бер һәйкәл булыр тип ышанабыҙ.