Шәп егеттәр бөтмәгән

Яңы йыл каникулдары дауам итә. Уны һәр кем күңелле һәм файҙалы итеп уҙғарырға тырыша. Эшҡыуар, Сибай башҡорттары ҡоролтайы башҡарма комитеты ағзаһы, Башмаркет сауҙа нөктәһе директоры Рөстәм Яратов белдереүенсә, 2 ғинуарҙа улар Баймаҡ районының Үрге Яйыҡбай ауылында йәштәр араһында волейбол буйынса турнир уҙғарған. Унда Иҫке Сибай, Темәс, Ниғәмәт, Түбәнге һәм Үрге Яйыҡбай, Түбәнге һәм Үрге Иҙрис, Йәнйегет, Татлыбай, Кәрешкә, Байыш, Ишмөхәмәт, Байым, Баймаҡ ҡалаһы командалары көс һынашҡан. Һөҙөмтәлә байыштар беренселеккә өлгәшкән. Икенсе урынды темәстәр яулаған.

Шәхси эшҡыуар Темәс ауылында йәшәүсе күп балалы ғаиләләргә яңы йыл күстәнәстәре лә таратҡан. Балалар ҡыуанһа, ер-һыу ҡыуана ти, халыҡ. Мәрхәмәтлек ҡылыусыларҙың изгелектәре үҙҙәренә сауап булһын. Шундай ир-егеттәребеҙ менән ғорурланабыҙ.