Милләтебеҙҙең аҫыл улдарын иҫкә алып

Бөгөн башҡорт халҡының арҙаҡлы улы, милли-азатлыҡ хәрәкәте башлығы, атаҡлы тюрколог, профессор Әхмәтзәки Вәлиди Туғандың тыуған көнө. Ошо уңайҙан Сибай ҡалаһының үҙәк урамдарының береһе-- Зәки Вәлиди урамында урынлашҡан бөйөк шәхесебеҙҙең һәйкәленә сәскәләр һалынды. Сарала мәктәптәрҙең тарих, башҡорт теле һәм әҙәбиәте уҡыусылары, мәғариф ветерандары, ҡоролтай ағзалары, уҡыусылар, урта махсус уҡыу йорттары студенттары ҡатнашты.

Тантаналы митингты ҡала хакимиәтенең мәҙәниәт бүлеге начальнигы, урындағы башҡорттар ҡоролтайы башҡарма комитеты рәйесе И.Р.Солтангәрәев асты.

--Республикабыҙҙың 100 йыллығы киң билдәләнгән йылда Зәки Вәлидиҙе иҫкә алмау яҙыҡ булыр. Башҡорттарҙы донъя кимәлендә танытҡан милләтебеҙҙең аҫыл вәкиленең ғилми эшмәкәрлеге генә түгел, тотош ғүмере тәрән өйрәнеүгә лайыҡ,--тине Илшат Рәшит улы. Уның һүҙҙәрен башҡа сығыш яһаусылар ҙа хупланы.