Тиҙҙән премьера!

-Хеҙмәткәрҙәрҙең отпускылары тамамланды. Барыһы ла матур итеп ял итеп, көс-дәрт туплап эшкә тотондо. “Сулпан” театрында премьеранан һуң 28 сентябрҙә 31-се ижад миҙгелен асыу концертына әҙерлек башланды. Шулай уҡ билдәле композитор Рим Хәсәновтың йырҙары һәм романстарынан торған концерт әҙерләнә,--тип пландары менән уртаҡлашты Сибай концерт-театр берекмәһе директоры вазифаһын башҡарыусы Юнир Кәлимуллин.

Етәксенең һүҙҙәрен йәмәғәт фекере лидеры Альбина Зөфәр ҡыҙы ла хупланы.

-Сибай элек-электән Урал аръяғының мәҙәни, мәғариф, сәнәғәт үҙәге булды һәм шулай булып ҡала. Бынан 3 йыл элек үҙ ишектәрен асҡан өр-яңы филармониябыҙ үҙе генә ни тора! Үҙебеҙҙең артистар ҙа рәхәтләнеп концерт, тамаша, спектаклдәр ҡуя, сит өлкә, республика йырсы-бейеүселәре, хатта Рәсәй эстрадаһы йондоҙҙары ла беҙгә юл һыуытмай. Халыҡ рәхәтләнеп ял итһен, концерт ҡараһын, мәҙәни яҡтан үҫешһен өсөн беҙҙең ҡалала бөтә шарттар ҙа тыуҙырылған,--тине Сибай тарих-тыуған яҡты өйрәнеү музейы директоры, йәмәғәт фекере лидеры Альбина Ярмуллина.

Урал аръяғындағы иң ҙур, мөһабәт мәҙәниәт усағы етәкселеге барлыҡ эшмәкәрлеген "Мәҙәниәт" милли проекты сиктәрендә атҡара.

Милли проект Рәсәй Президенты Владимир Путин указы буйынса эшләнгән һәм үҙ эсенә өс проектты ала: "Мәҙәни мөхит", "Ижад кешеләре", "Цифрлы мәҙәниәт".