Милли биҙәкле карта

Рәсәйҙең иң эре банкы илдең иң күп халыҡ йәшәгән милли төбәктәренең фольклор мотивтары менән карталар сығарҙы. Улар – Башҡортостан, Татарстан, Яҡутстан, Бүрәтстан һәм мәҙәни баш ҡала булараҡ Санкт-Петербург. Был хаҡта Башҡортостандың кредит һәм финанс ойошмалары ассоциацияһынан хәбәр иттеләр.

Башҡорт картаһы өсөн орнаментты Өфө рәссамы Нелли Аҡсурина яһаған.

«Ысын башҡорт орнаменты декоратив элемент ҡына түгел, ә визуаль код булып тора. Үҙ эшемдә мин башҡорт орнаментына хас геометрик һәм үҫемлек мотивтарын берләштерҙем, композицияның нигеҙендә – малсылыҡ, үләндәр һәм уңдырышлылыҡ символы булған ҡусҡар биҙәге», — тип һөйләне Нелли Аҡсурина.