Яҡташ ҡурайсыбыҙ баҡыйлыҡҡа күсте

Әхиәт Ғәйетбаев Баймаҡ районының бихисап таланттары менән дан тотҡан Буранбай ауылынан ине. Ул Өфө ҡалаһының Ленин районы башҡорттары ҡоролтайын да етәкләне. Үткән аҙнала ғына, 3 апрелдә, яҡташыбыҙ “Айыҡ ауыл” республика конкурсының финалында ҡатнашҡан Баймаҡ районының Таулыҡай ауылы делегацияһын хуплап, үҙенең шәкерттәре менән ҡурай уйнап йөрөгәйне. “Ихлас, эскерһеҙ, әҙәпле һәм юғары мәҙәниле ағайыбыҙ ине”, - ти уның тураһында яҡташтары. Әхиәт Ғәйетбаев Өфө сәнғәт училищеһында билдәле ҡурайсы Ғата Сөләймәновта белем алған. Өфө сәнғәт училищеһының Сибай филиалы директоры урынбаҫары була, 2007 йылдан баш ҡаланың 9-сы балалар музыка мәктәбен етәкләй. Уның тырышлығы менән белем усағына педагог, музыкант һәм халыҡ йырсыһы Әҙеһәм Исҡужиндың исемен бирелә, ә 2020 йылдан мәктәп яңы бинаға күсә. Арҙаҡлы милләттәшебеҙ менән бәхилләшеү 11 апрелдә, 13.00 сәғәттә Баймаҡ районының Буранбай ауылында үтә. Мәрхүмдең яҡындарының ауыр ҡайғыһын уртаҡлашабыҙ. Гөлдәр Яҡшығолова.