Ялған «Дәүләт хеҙмәте» вәкиле ҡатындың ярты миллион һум аҡсаһын урлаған. Рәсәй эске эштәр министрлығының Сибай ҡалаһы буйынса бүлегенә 570 мең һум аҡсаһын юғалтҡан граждан мөрәжәғәт иткән.  Хоҡуҡ һағы органы хеҙмәткәрҙәре ҡатындың телефонына билдәһеҙ ир шылтыратып, үҙен «Дәүләт хеҙмәте» вәкиле тип танытыуын асыҡлаған. Шылтыратҡан ир ҡатынға мутлашыусылар шәхси кабинетының телефон һанын алмаштырыуын, уның исеменә кредит юлларға маташыуҙарын белгерткән. Шәхси кабинетҡа инеүҙе тергеҙеү өсөн аферист хафаланған ҡатындан смс-хәбәрҙәр итеп ебәрелгән кодтарҙы әйтеүен һораған һәм шылтыратыуҙы ялған банк хеҙмәткәренә күсергән.

Банктың ҡыҙыу линияһына шылтыратҡандан һуң ғына ҡатын үҙенең мутлыҡ ҡылыусылар тоҙағына эләгеүен аңлаған.

Рәсәй эске эштәр министрлығының Сибай ҡалаһы буйынса бүлеге иҫкәртә: телефон буйынса берәүгә лә, бер ҡасан да шәхси белешмәләрегеҙҙе бирмәгеҙ, банк картаһының паролен һәм һанын әйтмәгеҙ. Ысын банк хеҙмәткәрҙәре аҡса күсереүегеҙҙе, смс код һорамай. Дәүләт хеҙмәте вәкиле шылтыратыуҙа шикләнеһегеҙ икән, һөйләшеүҙе туҡтатығыҙ рәсми һандар йыйып, мәғлүмәтте асыҡлағыҙ.

Мутлашыусылар популяр  темаларға баҫым яһай, мәҫәлән, коронавирус мәлендә, башҡа түләүҙәрҙе юллашыуҙа йәнәһе лә ярҙам күрһәтәләр. Рәсми мәғлүмәткә генә ышанығыҙ. Закондарҙағы үҙгәрештәр, түләүҙәр күләме һәм уларҙы юллау тураһында белешмәне рәссми ведомстволарҙың рәсми сайтында белешегеҙ.

Артур Илбулов, Рәсәй эске эштәр министрлығының Сибай ҡалаһы буйынса бүлеге оперуполномоченныйы.