Ир-егеттәр - сая, батыр, ә ҡатын-ҡыҙ тағы ла нәфисерәк, һомғолораҡ күренә

Бөгөн Башҡортостан Республикаһы халыҡтарының милли кейеме көнө билдәләнә. Борондан, ата-бабаларҙан быуындан быуынға күсеп килгән мираҫ өлгөләренең береһе булған милли кейемгә ихтирам йөҙөнөн Сибай ҡалаһының ЗАГС бүлеге хеҙмәткәрҙәре яңы өйләнешеүсе ғаилә парын милли кейемдә ҡабул иткән. Кейәү Рим Килдеғолов тантанаға бүректә, кәләше Резеда ла милли биҙәүестәр тағып килгән.

--Һәр халыҡтың үҙенә генә хас, ҡабатланмаҫ тарихын, ғөрөф-ғәҙәтен, йәшәү рәүешен сағылдырған, рухын, ғорурлығын уятҡан изге ҡомартҡы ул милли кейем. Башҡорт милли кейемендәге ир-егеттәр сая, батыр һәм ғорур, ә ҡатын-ҡыҙ тағы ла нәфисерәк, һомғолораҡ, нәзәкәтлерәк һәм һылыуыраҡ булып китә. Күҙҙәрҙә милли рух сағыла, бына беҙгә генә ҡарағыҙ, ниндәй бәхетле һәм һөйкөмлөбөҙ – тип йылмайҙы үҙ халҡының патриоттары Килдеғоловтар.

Автор:Гульдар Кадаева