Йәштәр ауылды һайлай

Йылайыр районы Юлдыбай ауылының иң йәш ғаиләләренең береһе—Айгөл менән Динар Солтановтар әле ҡәйнә-ҡайныһы йортонда йәшәй, әммә үҙҙәре айырым йорт төҙөй башлаған. Әбйәлил районы Рәхмәт ауылы ҡыҙы Айгөл Сорғот ҡалаһында балалар баҡсаһында эшләп йөрөгән сағында “Бәйләнештә”ге сәхифәһендә буласаҡ ҡәйнәһенән “Һаумыһығыҙ!” тигән хәбәр ала. Үҙенә таныш булмаған кешенән сәләм алыуы бер аҙ сәйер күренһә лә яуап яҙа. Артабан улар аралашып китә, ҡатын үҙенең улы барлығы хаҡында белгертә һәм уның телефон һандарын бирә. Әммә ҡыҙ егет үҙе шылтыратырға тейеш тигән уйҙан сығып, башлап телефон һанын йыйырға батырсылыҡ итмәй. Ниһайәт, Динар Айгөлгә сәләм ебәрә һәм йәштәр аралаша башлай. Күп тә үтмәй, Динар Солтанов Сорғот ҡалаһына килә һәм улар яҡындан таныша.

—Ҡәйнәм мине “Озон”дан яҙып алып бирҙе тип шаяртырға яратам,–ти Айгөл Солтанова.—Яҙмыш шулай ҡушҡандыр, Себерҙә эшләп йөрө лә, ауылға килен булып төшөп, ошонда йәшәргә ҡал инде (йылмая). Мөхәббәт емешебеҙ булып Мәҙинә ҡыҙыбыҙ донъяға килде, уға әле ике йәш. Ирем вахта ысулы менән Иркутск өлкәһендә эшләй.

Динар Солтанов ауылда үткән барлыҡ мәҙәни сараларҙа ла әүҙем ҡатнаша, бәләкәйҙән оҫта бейеүсе. Күптән түгел Айгөл менән Динар Солтановтар шаян бейеү өйрәнеп, бейеү конкурсында ҡатнашып, гран –при яулаған. Әле Айгөл үҙе шиғыр һөйләү конкурсына әҙерләнә. Ҡыҙҙарын да бар яҡлап һәләтле һәм талантлы итеп үҫтерергә тырышалар, бәләкәйҙән үк бейергә өйрәтәләр, баланы үҫтереүсе барлыҡ уйындарҙы ла һатып алғандар.

Бына шундай дәртле һәм уңған, тырыш һәм талантлы йәш ғаилә йәшәй Юлдыбай ауылында. Бәхеттәрен тыуған ерендә тапҡан Солтановтар күп йәштәргә өлгө.

К.Ишбулдина

Йылайыр районы

Һүрәттә—йәш ғаилә Айгөл менән Динар Солтановтар ҡыҙҙары Мәҙинә менән

Автор:Гульдар Кадаева

Читайте нас

Партнеры