Даниэль автомобилгә лайыҡ булды!

Баймаҡ районының Ҡуянтау ауылында бала саҡтан ат өҫтөндә үҫкән Даниэль Таймасов Силәбе өлкәһенең Ҡыҙыл районында үткән һабантуйҙа оло еңеүгә иреште. Төбәктә ат спортын үҫтергән Снежана һәм Рәмзил Таймасовтар ғаиләһен барыһы ла яҡшы белә. Улар төрлө ярыштарҙа Баймаҡ районы данын яҡлай, арғымаҡтары бәйгеләрҙә һәр саҡ призлы урын яулай. Был юлы улдары Даниэль үҙенең «Джо Байден» ҡушаматлы атында 10 саҡрымлыҡ дистанцияла барлыҡ юртаҡтарҙы артта ҡалдырып, финишҡа беренсе булып инде һәм лайыҡлы рәүештә төп приз-«Лада Гранта»еңел автомобиле асҡысын алды.

Таймасовтар был бәйгелә юғары күрһәткестәргә өлгәшеп, башҡорт атының данын йәнә бер тапҡыр сит өлкәлә танытты. Һабантуйҙа ғаилә башлығы абсолют чемпион булып танылһа, Снежана Таймасова төрлө арауыҡтағы заездарҙа өс тапҡыр икенсе урынға сыҡҡан.

Кәримә Усманова.