Ҡыйыулыҡ өлгөһө

Баймаҡ районы хакимиәте башлығы Азамат Иҙрисов йыш ҡына ялға ҡайтыусы яугирҙәр менән осраша. Күптән түгел ул Татлыбай ауылы батыры Азамат Рәхмәтуллинды ҡабул итте.
—Ҡыҫҡа ваҡытлы отпускыға ҡайтҡан геройҙарыбыҙ менән осрашыуға һәр ваҡыт ихлас шатмын. Азамат Рәхмәтуллин— ысын ҡыйыулыҡ өлгөһө. Ҡатынын юғалтып, өс ҡыҙын яңғыҙ тәрбиәләүгә ҡарамаҫтан, ауыр тормош һынауҙарына бирешмәгән, ул Ватанды һаҡлау юлын һайлаған. Яҡташыбыҙ десант-штурм дивизияһында хеҙмәт итә. Беҙ алдынғы тормош, ғаилә һәм киләсәккә пландар тураһында һөйләштек. Киләсәктә, уның менән бәйләнештә торасаҡбыҙ һәм ярҙам итәсәкбеҙ. Гуманитар ярҙамды әүҙем йыйыуҙы дауам итәбеҙ һәм яҡташтарыбыҙҙың һорауҙарына оператив яуап бирәбеҙ. Яугирҙәргә ышаныслы тыл тәьмин итеү—беҙҙең дөйөм бурысыбыҙ. Батырлыҡтары һәм сыҙамлыҡтары өсөн рәхмәт!—тип белдерә Азамат Сәфәрғәле улы.

Әйткәндәй, Баймаҡ районында ылау туплау дәррәү башҡарыла. Мәҫәлән, әлеге ваҡытта «Һаҡлаусы Фәрештә» ирекмәндәре, өй эштәрен ҡалдырып, штабҡа йыйылып, яугирҙәр өсөн түшәк кәрәк-яраҡтарын әҙерләй. Район дауаханаһы үҙҙәренә кәрәкмәгән матрастар һәм яҫтыҡтарҙы биргән, уларҙы ирекмәндәр яңырта: тышлыҡ тегәләр. Баймаҡ ҡалаһы, Ҡуянтау, Кәрешкә, Йомаш, Ярат, Ғүмәр, Ҡаратал һәм Әбделкәрим ауылдарынан ирекмәндәр әүҙемлек күрһәтеп, бер маҡсат өсөн берләшкән.  Берҙәмлектә көс икәнен баймаҡтар яҡшы аңлай.

мәғлүмәт һәм фото Баймаҡ районы башлығының социаль селтәренән алынды.