+30 °С
Болотло
Замандаш
15 Май 2025, 08:50
Таҡтаташтан яугир баға
Сибай медицина колледжында махсус хәрби операция барышында батырҙарса һәләк булған Айнур Фазылғаян улы Тәржемәнов иҫтәлегенә мемориал таҡтаташ асылды. Сарала ҡыйыу егеттең әсәһе Әминә Тәржемәнова, туғандары, яҡындары, уҡыу йорто студенттары, хәрби комиссариат вәкиле, һәләк булыусыны яҡындан белгәндәр ҡатнашты. Айнур Фазылғаян улы Тәржемәнов 1981 йылдың 1 декабрендә Сибайҙың Алтын ҡасабаһында ябай эшселәр ғаиләһендә уртансы бала булып тыуған. Алтын ҡасабаһы, ҡаланың 4-се мәктәбендә белем алғандан һуң, 24-се һөнәрселек училищеһында балта оҫтаһы һөнәрен үҙләштергән. Әрме хеҙмәтен Түбәнге Новгород ҡалаһындағы эске ғәскәрҙәр сафында стрелок булараҡ үтә. Ватаны алдындағы бурысын тултырып ҡайтҡас та Сибай медицина колледжына балта оҫтаһы булып эшкә урынлаша һәм 19 йыл буйы үҙ һөнәренә тоғро ҡала. 2022 йылдың сентябрендә Айнур Тәржемәнов өлөшләтә мобилизация сиктәрендә Рәсәй Федерацияһының Хәрби көстәре сафына саҡырыла. Хәрби әҙерлек үткәндән һуң Донецк Халыҡ Республикаһындағы 41867-се хәрби частың 428-се мотоуҡсылар полкында стрелок була. Махсус хәрби операция барышында “Ҡыйыулыҡ, ҡаһарманлыҡ, батырлыҡ өсөн”, 2-се дәрәжәле “Хәрби ҡаҙанышы өсөн” миҙалдары менән наградлана. Яҡташ яугир 2024 йылдың 12 декабрендә Донецк Халыҡ Республикаһындағы Новоалексеевка янындағы ҡаты бәрелештәр ваҡытында хәрби заданиены үтәгәндә һәләк була. Ҡыйыу егетте быйыл 26 ғинуарҙа Сибайға алып ерләйҙәр.
Таҡтаташтан яугир баға
Таҡтаташ асыу сараһында Сибай медицина колледжы директоры вазифаһын башҡарыусы Светлана Үтәшева, уҡыу йортоноң хәүефһеҙлек буйынса начальнигы, Төнъяҡ Кавказда хәрби бәрелештәрҙә ҡатнашыусы Фәнүр Ишморатов, Сибай ҡалаһы һәм Хәйбулла районы буйынса хәрби комиссариаттың контракт буйынса һайлап алыу пункты инструкторы Дмитрий Рычин, Сибай үҙәк дауаханаһының профком рәйесе Басир Шәрипов Айнур Фазылғаян улын тик яҡшы яҡтан иҫкә алды.
Яугирҙең ике туған апайы Мәҙинә Нәҙерғолова нәҫел-заттарындағы ир-егеттәрҙең Тыуған илгә ҡурҡыныс янағанда гел алғы һыҙыҡта булыуҙары менән ғорурланды. Бөйөк Ватан һуғышында фашистарға ҡаршы тороусыларҙың күп булыуын да әйтеп үтте.
-Айнур ҡустымдың атаһы Фазылғаян Абдрахман улы Йошкар-Ола ҡалаһында хәрби хеҙмәтен үтәне. Олатайыбыҙ Абдрахман Ишбулды улы Тәржемәнов Бөйөк Ватан һуғышы ветераны. 1941 йылдың октябрь айында фронтҡа алына һәи теүәл 4 йылдан, 1945 йылдың октябрь айында әйләнеп ҡайта. Уның бер туғандары Абдулла, Хәбир һәм Иҙрис Тыуған илебеҙҙең азатлығы өсөн үҙ ғүмерҙәрен биреп, яу яландарында ятып ҡалды,--тип һөйләне Мәҙинә Ғәйнетдин ҡыҙы.-Абрахман Ишбулды улы Сибайҙа шахтала забойщик булып эшләй. 1954 йылдың йәйендә һуғышта алған яраларҙан мандый алмай 42 йәшендә генә донъя ҡуя. 3 улы менән ҡатыны Фатима еңгәйебеҙ тол ҡалды. Ул кесе улы Фазылғаяндың ғаиләһе менән йәшәп, уның 3 улы Айҙар, Айнур, Илдусты үҫтереште. Айҙар, Илдус Тәржемәновтар үҙ ғаиләләре менән айырым йортта торһа, Айнур атаһы нигеҙен һаҡлап, әсәһе менән йәшәй ине. Уның да ғүмерен ҡәһәрле һуғыш ҡыйҙы.
Ҡыйыу яҡташыбыҙҙың әсәһе Әминә Тәржемәноваға улы тураһында һөйләүе ауыр булды. Шулай ҙа ул үҙендә һәр яҡлап ярҙам күрһәтеүсе Сибай медицина колледжы етәкселегенә рәхмәттәрен әйтергә көс тапты.
Айнурҙы хеҙмәттәштәре ышыныслы, баҫалҡы, эшһөйәр, изге күңелле, кешелекле, кеселекле, ярҙамсыл, туған йәнле булды, тип хәтерләне. Уҡыу йорто студенттары иһә уға оҡшарға тырышырға, уның кеүек Тыуған илде сикһеҙ һөйөргә, уның менән ғорурланырға, батырлығын бер ваҡытта ла онотмаҫҡа һүҙ бирҙе.
Гөлдәр Ҡадаева.
