Ир-егеттәр именлегенә ҡорбан салдырған

Баймаҡ районының Кәрешкә ауылынан эшҡыуар, крәҫтиән-фермер хужалығы етәксеһе Линар Әхмәтов ҡатыны менән махсус хәрби операциялағы ир-егеттәрҙең имен-һау ҡайтыуын теләп ҡорбанға үгеҙ салған. 2025 йыл - Махсус хәрби операцияла ҡатнашыусыларға һәм уларҙың ғаиләләренә ярҙам итеү йылы. Нарыҡланған йылда фермерҙың изге эшен ауыл халҡы ла хуплай һәм күмәкләшеп итте бүлергә ярҙам итә. Ауыл мәктәбе хеҙмәткәрҙәре иһә унан 90 банка тушенка яһаған. Әхмәтовтар тушенкаларға ҡалған итте ҡушып, районда гуманитар ярҙам йыйылған урынға алып барып тапшырған.

-Мәрхәмәтлек сараһында ҡатнашҡан һәр кемгә рәхмәт! Посылкалар, күстәнәстәр алғы һыҙыҡҡа имен-аман барып етеп, яугирҙәребеҙҙең беләктәренә көс, үҙҙәренә кәйеф, рух ныҡлығы өҫтәһен.

Тиҙерәк утлы ғәрәсәт тамамланһын! Ир-егеттәребеҙ имен-һау тыуған яҡтарға әйләнеп ҡайтһын! - тип яҙа социаль селтәрҙә КФХ етәксеһе Линар Әхмәтов.

Фермерҙың изгелеге үҙенә меңләтә сауап булып әйләнеп ҡайтһын!

Автор:Гульдар Кадаева

Читайте нас

Партнеры