Хәбиров Хәбировҡа маҡтаулы исем тапшырҙы!

Руслан Хәбиров Сибай үҙәк дауаханаһында табип булып эшләне. Бер нисә йыл ҡала хакимиәте башлығының кадрҙар буйынса урынбаҫары вазифаһын да башҡарҙы. Оҙаҡ йылдар Сибай ҡалаһындағы Урал аръяғы халыҡ мәшғүллеге үҙәген етәкләне.

-Илдә махсус хәрби операция барғанда тыныс тормошҡа ҡарағанда, алғы һыҙыҡта нығыраҡ кәрәклегемде аңланым. Гиппократ антына тоғролоҡ биргән кеше булараҡ, намыҫым ҡушҡанса эшләнем һәм Рәсәй Федерацияһының Оборона министрлығы менән контракт төҙөнөм. Ысынлап та, табип булараҡ, минең урыным унда. Яралыларҙы бағырға, дауаларға кәрәк. Тиҙерәк еңеү яуланһын өсөн тырышабыҙ, -- ти Руслан Юныс улы.

Әйткәндәй, ул махсус хәрби операция биләмәһенән ҡыҫҡа ваҡытлы ялға ҡайтҡан һайын Сибай ҡала хакимиәте башлығы Азамат Юлдашбаев, урындағы ваҡытлы матбуғат хеҙмәткәрҙәре менән осраша. Гуманитар ярҙам өсөн рәхмәт әйтә, алғы һыҙыҡтағы ир-егеттәргә нимәләр кәрәклеген белгертә.

Руслан Юныс улы «Башҡортостан Республикаһының атҡаҙанған халыҡты социаль яҡлау хеҙмәткәре» маҡтаулы исемен Республика Башлығы Радий Хәбиров ҡулынан алды.

Был хаҡта  Башлыҡ социаль селтәрҙәге сәхифәһендә:

-Был баҫалҡы кеше ысын ҡаһарманлыҡ һәм патриотизм өлгөһө. Маҡтаулы исемгә ул күптән лайыҡ. Яугир-табип менән полктың тәьминәте тураһында һөйләштек. Башҡа яҡташтар кеүек ул да туҡтауһыҙ барып торған гуманитар ярҙам өсөн рәхмәт белдерҙе. Алғы һыҙыҡта медикаменттарға ҡытлыҡ юҡлығын да белгертте, -- тип яҙҙы.

Руслан Юныс улы Хәбировты юғары наградаға лайыҡ булыуы менән ысын күңелдән ҡотлайбыҙ!

Ир-егеттәребеҙҙең тиҙерәк еңеү яулап, имен-һау, теүәл тыуған яҡҡа ҡайтыуҙарын теләйбеҙ!