-16 °С
Болотло
Бөтә яңылыҡтар
Ял минуттары
11 Февраль 2025, 17:25
Кәпәстау
Саңғыһын күтәреп сыҡҡан Илнур, иртәнге ҡояш нурҙарына сағылған күҙҙәрен сылт-сылт йомоп, мең төрлө төҫтә балҡыған ҡар бөртөктәренә һоҡланып ҡарап торҙо. Ниндәй матур иртә. Аяҡ аҫтында шығырлаған ҡар ҙа үҙенә бер төрлө көй кеүек яңғырай.Кистән һөйләшеп ҡуйғанса, иртәнге эштәрҙе атҡарғас атаһы менән Кәпәстауға саңғы шыуырға барырға тейештәр. Бына бәләкәй түбәне төшкәс, тауға ҡарай юл тоттолар. Илнур күптән тел осонда торған һорауҙы бирҙе:-Атай, ни өсөн ул “Кәпәстау” тип атала?
Әғләм ағай былай тип һүҙ башланы:
-Уның тарихы һинең ҡартатайыңдың дуҫы Афзал олатайың менән бәйле. Элегерәк ҡыштар ҙа һыуыҡ, бурандар ҙа көслөрәк булған. Бер көндө шулай малайҙар әлеге беҙ барған тауға саңғы шыуырға сығып киткәндәр. Ул ваҡытта уның исеме лә булмаған. Бейек Ҡыҙҙар тауының ышығында ятҡан Кәпәстауҙа шау-гөр килеп йөрөй торғас, көслө буран сыҡҡанын да һиҙмәй ҡалғандар. Ҡайтырға йыйынып, тағы бер тапҡыр өйөлөп төшөргә тип, тау башына менеп китәләр. Бер-бер артлы шыуған ваҡытта Афзалдың кәпәсен ел осороп алып китә. Күпме тырышып эҙләһәләр ҙә, таба алмайҙар. Шунан алып тауға “Кәпәс” исеме ҡушылып ҡала.
Кәпәстауҙан туйғансы саңғыла өйөлгән Илнур, атаһы кеүек йылдам шыуып, әңгәмәләшә-әңгәмәләшә ауыл яғына ыңғайланылар. Ҡышҡы ҡояш та, уларға эйәреп, Һарытүбәгә ҡарай тәгәрәне.
Хәмит Карамалинский.
ФОТО ИНТЕРНЕТТАН
Новости партнеров