Ҡыҙыл айфон

Юмористик хикәйә

Мөслимә ханым, ғәҙәттәгесә, һуңлаңҡырап килеп инде бына-бына башланырға торған, байрам еҫе аңҡыған банкет залына. Уға, ирене менән йылмайып, күҙҙәре менән көнләшеп ҡарап, иң яҡын әхирәте өҫтәл түрендәге урынын күрһәтте. Көнләшерлек тә шул, сирек ғүмерен ошо эшкә бағышлауына ҡарамаҫтан, Рәмиғаны түгел, был ойошмаға бығаса бер ҡағылышы булмаған Мөслимәне алып килеп ултырттылар хужа итеп. Рәмиға, бар ерен ҡыҫып, түҙеп йөрөй инде хәҙер. Ҡалайтаһың, сара юҡ. Насар уйҙарын еңел генә һелкеп ташларға теләп, йөҙөнә йылмайыу ҡиәфәте сығарып, йәнә ары сапты Рәмиға.
Инде көтөп талсыға башлаған хеҙмәткәрҙәр, Мөслимә Мөкминовнаны күреү менән, геү итеп ҡалдылар ҙа, бар иғтибарын уға йүнәлттеләр.
Бындай күмәк йыйылған сараны тәү тапҡыр үткәргестен, тулҡынланыу ҡатыш ҡәнәғәтлек тойғоһо кисереп һүҙ тотто яңы ҡуйылған түрәбикә. Телгә тилберлеге бар уның. Матур теҙҙе телмәрҙе Мөкминовна. Еренә еткереп ҡотланы, теләктәр әйтте. Үҙенең һүҙенән үҙе кәйефләнеп, Яңы йыл хөрмәтенә лыҡа тултырылған шарапты түңкәргәнсе күтәреп йөпләп, төпләп ҡуйҙы һүҙен. Шуны ғына көтөп торған һәммәһе лә шау килеп, бокалдарҙы сатнағансы сәкәштереп, эсеп ебәрҙеләр. Эт һарыған арауыҡ тынлыҡ урынлашып торҙо ла, эй башланып китте-е-е. Тел тигәндә телеп һалыусы әҙәбиәт белгестәре, береһенән-береһе арттырып, матур һүҙ һөйләнеләр, әйткән һайын рүмкә, бокалдар бушай торҙо. Корпоратив ҡыҙғандан-ҡыҙа барҙы. Баяғы бызмырҙап ултырған шампан шарабы, унан ҡатыраҡ эсемлектәр башты һәм башҡа ерҙе зымбырҙата башланы.
Дәртле музыка уйнау башлау менән, барыһы ла эләгә-йығыла бейергә төшөп китте. Кемуҙарҙан арттырып, бар ағзаһын һелкетеп, мыймылдатып арманһыҙ булғансы һикергеләгәс, йәнә өҫтәл артына ултырҙылар. Көрмәлә башлаған телдәр яңынан һүҙ башланы, күккә сөйөп маҡтауҙар яуҙырҙылар Мөслимә Мөкминовнаға арнап. Бирешергә теләмәһә лә, йомшаҡ телдәр үҙенекен итте. Күңеле күтәрелеп нескәрҙе, йомшарҙы, ирене. Талғын көй башланыуға, уны бейергә саҡырҙылар, иҙерәп өйөрөлдө уның ҡосағында Мөслимә ханым.
Тулыһынса кисә барышына ҡәғәтләнеп, өҫтәл түрендә ултырған килеш һәр хеҙмәткәрен күҙләне. Әллә байрам шауҡымынан, әллә ысынынан оҡшай ине уға коллективы. Һәр береһенең матур һәм кире яҡтары бар барлыҡҡа. Әллә белеп бөтмәйме барыһын да, ваҡыт күрһәтер, тигән уйҙар башын сыймаҡлағанда, ҡапыл ҡып-ҡыҙыл тышлы, яратып йөрөткән айфоны тауыш бирҙе. Асып ҡарауға, яңы йыл менән ҡотлап, һүҙ-һүрәттәр тупырлашып килеп сыҡты. Һуңынан уҡырмын тип, кескенә сумкаһының төбөнә үк тығып ҡуйҙы телефонын. Уның бер әтнәкәһе лә бар шул. Һуңғы ваҡытта ниҙәндер нәмәһен юғалтыуға әйләнеп китте, әллә ҡартлыҡ касафаты. Тәүге тапҡыр борсолмаһа ла, алтын тирәсле ҡиммәтле күҙлеген ҡайҙалыр ҡалдырыпмы, төшөрөпмө киткәс, һаҡсылыраҡ ҡылана хәҙер. Әйберен төпкәрәк ҡәҙерләп йәшереп ҡуя.
Корпоратив шау-шыулы, күңелле дауам итте, кемдер шиғыр һөйләп, кемеһелер йырлап, ҡыҙған баштан һөнәрен күрһәтте. Ана бит, оҙон буйлы, яңыраҡ алыҫтан килеп эш башлаған ҡыҙһыраған егет тә ҡәҙимге генә мөңгөрәй-мөңгөрәй әле бер, әле икенсе ҡатын-ҡыҙ артынан эйәреп йөрөй.
Йәнә матур тостар әйтелде лә, һауыттар төп күтәрелде. Уртаса ҡыҙмасанан ныҡҡа әйләнеп киткән ҡунаҡтар тағы ла дәртләнеп күңел астылар.
Әхирәте ҡыр быуынына төшөп һорағас, уның туғаны Гөлнисаны эшкә алғайны. Хәҙер инде айырылмаҫ дуҫҡа әйләнде лә киттеләр. Магазин-маҙарға ла бергә йөрөйҙәр, ҡунаҡҡа ла. Шул тиклем бер-береһенә яҡынайҙылар. Тауыштарына хәтлем оҡшаған. Хатта бер төрлө айфон һәм уға ҡыҙыл тышты ла шундай уҡтан алдылар.
Яңы әхирәте Гөлниса бигерәк дәртле күренә, әле лә, өҫтәл эргәһенә килеп, оҫта итеп һауытын бушатты ла, айфонын өҫтәлгә ырғытып, һикерткес көйгә ырғаңдай ҙа башланы. Ярайһы уҡ тулы кәүҙәһен килешле һығылдырып әй өйөрөлдө. Тамам башына бәргән эсемлектән иҫереп, үҙен сәхнә йондоҙолай хис итте. Туфлиҙарын сисеп ташлап , ихласлап, күҙҙәрен йомоп тороп бейене, барыһы ла ҡарай, һоҡлана кеүек тойолдо уға.
Сираттағы матур һүҙҙе һәм гәлсәр һауытты теүәлләп ҡуйғас, Мөслимәнең дә дәрте ташып китеп, оҫта гармунсының көйөнә бер иле тыпырҙатты. Баш әйләнде, кәйеф йәнә лә юғарыраҡҡа үрмәләне. Хәлдән тайып, урынына килеп ултырҙы ла, ҡыҙыл тышлы телефон күреп ҡалып, әллә оноттом һалып ҡуйырға, ҫыумейе, тип үҙен-үҙе әрләп, йәнә сумкаһына тыҡты.
Оҙаҡламай ҡыҙғансыҡ бисә-ирҙәре шылтырата башлағас, яйлап ҡына шылыусылар күренде. Миңә лә ваҡыт, тип уйлап, Рәмиға әхирәтенә такси саҡырырға ҡушты. Уның йыйыныуын шәйләп ҡалғандар шунда уҡ уратып алып, хуш аяғына шарап тотторҙолар. Шампанды төп күтәрҙе лә, килеп еткән таксиға ашыҡ-бошоҡ, кескенә сумкаһын эләктереп, ултыра һалды. Радионың талғын көйөнә иҙерәп кенә, йоҡо баҫып, иләҫ-миләҫ китеп барғанда ҡапыл телефон шылтыраны. Ҡолағына терәгән айфондан асыулы ир тауышы ишетелде:
- Һин ҡайҙа йөрөйһөң, һәперәбаш?
Бер аҙ аптырашта ҡалған Мөслимә:
- Һин, вообще, кем ул? - тип һораны.
- Иреңде лә танымаҫлыҡ булып иҫерҙеңме инде? - тип ҡаты һүгенде кемдер теге оста.
Асыуы килеп:
- Своего "рогатика" давно уже выгнала, теперь я свободная женщина, - тип, урыҫсалап яуап ҡайтарҙы Мөслимә. - Бына ахмаҡ, ирең тип тороп шылтырата бит әле, етмәһә, ҡайһылай ҡаты әрепләшә, нишана.
Эстән әрләп ултырғанда, тағы шылтыраны телефон.
- Хәҙер үк ҡайтып ет, - тип екерҙеләр. Бөтөнләй енләнгән Мөслимә, таныш булмаған иргә:
- Мин яңғыҙым түгел, егетем менән, - тигән яуап оҙатты.
Ә был ваҡытта банкеттың ҡыҙыуы һүрелгән, күңел асып арыған, инде айныға төшкән Гөлниса, бет итеп, телефонын эҙләй ине. Ышҡаңлап бейей торғас, йылан йылына арнап ялтырауыҡтар ҡуйып тороп теккән йәшел күлдәге лә таушалып бөткән, иҙән тулы тәңкәләре һибелгән. "Ҡот осҡос бит был хәл", - тиеп уйланы ул. Ҡиммәтле айфон әллә ҡайҙа, ире шылтыратһа, телефон юҡ. Бөтөнләйгә кәйефе төштө Гөлнисаның, асыулы иренән шөрләй ул. Уның хәмер ҡапҡанын яратмай һөйгәне. Артына скипидар һөрткәндәй, унда йүгергеләне, бында сапты. Күмәкләп эҙләмәгән тишек ҡалманы, әммә ҡыҙыл айфон, айға осҡандай, юҡҡа сыҡҡайны.
Ҡатынынан бындай уҡ ҡылыҡты көтмәгән Сәфәр асыуынан ер шарын әйләндерер хәлгә еткәйне. Нимә тей бит әле, "рогатика" давно выгнала, егетем менән. Әйтерһең, уға бер кем түгелмен. Иманыңды уҡытырмын һинең, тигән уйҙар менән, йәнтәслимгә машинаһын банкет барған ергә ҡыуҙы.
Мөслимә, фатирына инеп: "Уф, наконец-то," - тип, диванына гөрҫ итеп ултырып та өлгөрмәне, йәнә шылтыраны телефоны.
- Йәнем, өйҙәһеңме? - таныш тауыштан һикереп торғанын һиҙмәй ҙә ҡалды, ирәбеләнеп китте, кәйефе лә күтәрелде.
- Өйҙәмен, кил, - тиеп әйтергә лә өлгөрмәне, сумкаһында йәнә бер телефон шылтыраны. Ике ҡулына ике ҡыҙыл айфон тотоп, аптырап торҙо ла Мөслимә ханым, ысынлап та һиңмаймын тип, йәнә гөп иттереп диванға ултырҙы.

Хәмит Карамалинский.