Сәскәйҙәрең толом-толом

Минең әсәйем һәр ваҡыт сәстәремде йыйып йөрөргә ҡуша. Сәстәр һәр ваҡыт йыйылған булырға тейеш, ти ул. Бөхтә итеп үреп, яулыҡ, йә панама менән башты ҡаплап өйрәнгәнмен мин. Сөнки сәстәр, кешенең энергетикаһын һаҡлаусы.
Әсәйемдең йәш сағында сәстәре ҡуйы һәм оҙон була. Студент ваҡытында күп ҡыҙҙар уның сәсенә көнләшеп ҡараған. Бер ваҡыт ул ныҡ итеп ауырып китә. Табиптан табипҡа йөрөү файҙа бирмәй, уның ауырыуы аҙа ғына бара. Һуңынан уны әсәһе кешеләрҙең кәңәше буйынса әбейгә алып бара. Әбей уға насар кешеләрҙең күҙе тейгәнен әйтеп, дауалай башлай. Дауалау осоронда әсәйемдең сәстәре услап ҡойола. Әбей әсәйемдең сәстәре бар насар энергияны үҙенә алғанға күрә, ҡойолғанын аңлата. Һуңынан әсәйем сәстәрен бик ҡыҫҡа итеп ҡырҡтырып, саҡ яңынан үҫтереп ала. Шул хәлдән бирле ул, сәстәр кешеләрҙең энергетикаһын һаҡлай тигән ышаныста.