Хәйбулла районы үҙәге Аҡъяр йылдан-йыл ҙурая. Бында төбәктең ялан яғынан да, урман биләмәһенән дә йәштәр яңы биҫтәгә күсеп килеп шәхси йорт һала, эшкә урынлаша, балалар үҫтерә. Быйыл йәй урында йәшәүселәр башланғысы менәнҡасабаның Рәшит Ниғмәти урамында ҡыҫҡа ваҡыт эсендә балалар майҙансығы ҡалҡып сыҡты. Йәмәғәт урынын төҙөкләндереүгә Аҡъяр ауылы Советы депутаты Евгений Иманов һәм «Аҡъярводстрой» йәмғиәте эшселәре ҙур тырышлыҡ һалған.
✅-Элек буш ятҡан урында әүһәләк, таусыҡтар урынлаштырылып, тренажерҙар ҡуйылып, йылға ҡомо түшәлеп, бынамын тигән балалар майҙансығы барлыҡҡа килде. Бәләкәстәр ҙә, үҫмерҙәр ҙә йәй буйы шунда рәхәтләнеп уйнаны,--ти йәмәғәт фекере лидеры Ырыҫбикә Аллағолова, бағыусыларға ҙур рәхмәт әйтеп.-Ата-әсәләр хәҙер урамға уйнарға сыҡҡан балаһы өсөн тыныс. Элек ҡайҙа барып һуҡлығырға белмәй йөрөһәләр, әле майҙансыҡта шат тауыштар тынмай. Хатта күрше урамдарҙан да балалар килеп уйнай.