Сибай фельдшерҙары һынатманы

Медицина хеҙмәткәрҙәре Динислам Ҡарамурзин һәм Салауат Иҙрисов Иркутск өлкәһендә уҙған «Сөнки, беҙ бергә» Бөтә Рәсәй туристик слетында Башҡортостандың һаулыҡ һаҡлау хеҙмәткәрҙәре профсоюзы исеменән сығыш яһаны. Аҡ халатлылар һөйләүенсә, туристик фестивалдең программаһы бик көсөргәнешле булған. Командаларға ҡаршылыҡтар һыҙатын, контроль-туристик маршрутты һәм һыу дистанцияларын үтергә тура килгән. Шулай уҡ лагерҙы йыһазландырыуҙа һәм күрһәтмә сығыштарҙа ижади һәләт тә баһаланған. Рәсәйҙең 17 төбәгенән вәкилдәр ҡатнашҡан ярышта Башҡортостандың медицина хеҙмәткәрҙәре 3-сө урынға өлгәшә.

Тиҙ ярҙам хеҙмәтендә эшләүсе егеттәр әйтеүенсә, бындай сараларҙа ҡатнашыу аралашыу ҡеүәһен арттыра, эмоциональ яҡтан хәлде яҡшырта, сәләмәт йәшәү рәүешенә ылыҡтыра. Республиканың йыйылма командаһына алынған йәш белгестәр киләсәктә лә туристик слеттарға йөрөргә, тағы ла юғарыраҡ уңыштарға өлгәшергә иҫәп тота.

Автор:Гульдар Кадаева

Читайте нас: