Аттарҙа сабып ҡына...

Урал аръяғы халҡы ҡышты оҙатыу өсөн Темәскә йыйылды. Бында ҡышҡы бәйге уҙғарылды.

Темәс ауылында йыл да ат сабышы уҙғарыла. 6-сы тапҡыр уҙғарылған быйылғы сараға республиканың төрлө төбәктәренән 70-ләгән кеше йыйылды. Улар һыбай һәм санаға егеүле аттарҙа уҙышты.

Баймаҡ районынан Динис Байғузин ярышҡа йыл да килеүен һәм һәр саҡ 1-се урын алыуын белдерҙе.

Ҡар яуып тороуға ҡарамаҫтан, көйәрмәндәр ҙә күп булды. Улар күңелле көй аҫтында бәйгеселәрҙе дәртләндереп торҙо. "Темәс" тарихи-мәҙәни үҙәге тирмә ҡуйып, сараны биҙәне. Үҙәктең баш белгесе Айҙар Мәжитов сарала ҡатнашыусыларға 112-се кавалерия дивизияһының Ҡорос аты хаҡында һөйләне. Ул яуҙа иҫән ҡалып, тыуған яғына - Миәкә районы Илсеғол ауылына ҡайта.