Ҡурайсы рухы йәшәй

Зәңгәр экрандар аша «Хазина» тапшырыуын алып барыусы булараҡ киң билдәле яҡташыбыҙ, Башҡортостандың халыҡ артисы, С.Юлаев исемендәге премия лауреаты Юлай Ғәйнетдинов алып барған Хәтер кисәһе ысын мәғәнәһендә хазинаға торош ине. Экранда элекке видеояҙмалар күрһәтелде, унан беҙ атаҡлы ҡурайсыларҙың Хәмит Әхмәтов хаҡында һөйләгәндәрен ишеттек, ә сәхнәгә хәҙерге ҡурайсылар сыҡты. Юлай Ишбулды улы улар менән таныштыра барҙы. Улай ғына ла түгел, ҡурайсылар башҡарған һәр йыр-көйҙөң тарихын һөйләне.

Сараны Шамил Күсәмишев, Рәмил Ҡотосов, Фәнил Кинйәғолов, Руслан Бикбаев, Ыласын Мәғәфүров, Әнүәр Ниғмәтуллин, үҙе йырсы, үҙе ҡурайсы, үҙе атҡаҙанған бейеүсе Хәбир Аралбаев биҙәне.

Хәтер кисәһендә Хәмит Әхмәтовтың күп һанлы туғандары ҡатнашты. Уларҙың нәҫелендә сәнғәт әһелдәре булыуы, үҫеп килеүсе балалар араһында ҡурайсыларҙың барлығы ҡыуандырҙы. Тимәк, нәҫел моңо тынмаясаҡ.

Резеда Усманова.