Юлдар торошо яҡшырырмы?

Кремлдә Рәсәй Президенты В.В.Путин рәйеслегендә автомобиль юлдары селтәрен үҫтереүгә һәм юл хәрәкәте хәүефһеҙлеген тәьмин итеүгә арналған Дәүләт советы ултырышы үтте.

Владимир Путин белдереүенсә, беҙҙә юғары сифатлы юлдар, үкенескә күрә, һаман да әҙ. Беренсе категория юлдарының дөйөм оҙонлоғо һуңғы дүрт йылда артҡан-артыуын. 2423 км-ға еткән. Былар - федераль трассалар. Алға китеш бар, тиһәк тә була. Әммә, ил башлығы әйтеүенсә, төбәк әһәмиәтендәге юлдарҙы яҡшыртыу мәсьәләһе буйынса эшләргә лә эшләргә.

Юл хужалығында системалы үҙгәрештәргә өлгәшеү өсөн төбәктәр яҡын арала махсус программа ҡабул итергә тейеш.

Беҙҙең "Хәүефһеҙ һәм сифатлы автомобиль юлдары" милли проекты ла бар. Президенттың был юҫыҡтағы эштәрҙең һөҙөмтәләрен күргеһе килә.

Тағы ла бер мөһим мәсьәлә: ауыр йөк машиналарының юлын көйләү. Ундайҙар юл торошона туранан-тура йоғонто яһай. Ауыр йөктө күтәрә алмаҫтай юлдар күп шул әле. Рөхсәт ителмәгән трассанан йөрөгән авмомашиналар күп осраҡта юлды емерә һәм һөҙөмтәлә был тирәлә мотлаҡ авария булып ҡуя. Был йәһәттән контролде көсәйтергә кәрәк, тине ил етәксеһе.

Ғөмүмән, Дәүләт советының әлеге ултырышы темаһы - бик етди. Һәм ҡарайһы мәсьәләләре лә күп. Уларҙы советтың эш төркөмө айҙар буйы анализлап, тикшереп сыҡҡан.

#ВВПутин

#нацпроекты