Снаряд ярсыҡтары тынғы бирмәне

Ете урындан яраланған ҡәҙерлем ярты йыл үткәс кенә саҡ аяғына баҫа һәм 1 йыл үткәс кенә госпиталдән сыға. 20 йәшендә зәғиф булып тыуған ауылына ҡайтып төшә.

Уны күргәс туғандар һәм ауыл халҡы аптырап ҡала. Сөнки уның үлеме хаҡында 2 тапҡыр “ҡара ҡағыҙ” килә. Имамбаев Мәхмүтйән күп тә үтмәй әсәйемә-Шәрифә Шәһивәли ҡыҙына өйләнә. Улар 50 йылға яҡын татыу тормош көттө. 7 малай һәм 4 ҡыҙ үҫтерҙеләр. Әсәйем Шәрифә Шәһивәли ҡыҙына 1971 йылда “Герой әсә” исемен бирҙеләр. Атайым колхозда ғүмере буйы бригадир булып эшләне.

Ә әсәйем фермала һарыҡтар ҡараны. Беҙ ҙурайғас та әсәйем йәйен-ҡышын колхоздың башҡа эштәрен эшләне: ҡул сапҡысына сығып бесән эшләште, сөгөлдәр, картуф уташты. Һуңынан магазинда йыйыштырыусы булды.

Беҙ күмәк булһаҡ та бәхетле үҫтек, ас-яланғас булманыҡ, етеш тормошта йәшәнек. Әсәйем ғүмере буйы кешеләргә күлдәктәр текте, балаҫтар һуҡты, шәлдәр бәйләп һатты.

Ә атайым 3 улына, 1 ҡыҙына өй эшләгәндә аҡсалата ярҙам итте.

Һаулығы ғына самалы булды, күкрәгендә снаряд ярсыҡтары ҡалып, ғүмере буйы һыҙланды.

Еңеүҙең 50 йыллыҡ байрамына 1 ай ярым ҡалғас, 26 мартта мәрхүм булды.”Миңә 50 йыллыҡ тау башында”,--тиер ине ул. Таулыҡай ауылы зыяраты тау башында шул.

Кешеләрҙең атайҙарына, һуғыш ветерандарына фатир бирҙеләр. Атайым өйһөҙ булманы, тик Бөйөк Ватан һуғышы ветерандарына тәғәйен фатир ала алманы. Әсәйем мәрхүмә булғанса шуға әсенде, хатта тыл ветерандарына фатир бирҙеләр, ә атаңа юҡ тип, көйәләнде.

Ҡайным Мирзайән Мәхейәновтың бер туғандары Аҫылбаев Рәхимйән, Миҙәхәт Уйылдан улдары ла һуғышта булған. Еҙнәһе Талипов Шәйәхмәт тә Бөйөк Ватан һуғышы ветераны ине. Уларҙы оноторға хаҡыбыҙ юҡ.

Ҡәһәрле һуғыш башҡа ҡабатланмаһын тип теләһәк тә донъяла тыныслыҡ юҡ. Хәйҙәр ҡустыбыҙ Афғанстан һуғышында ҡатнашып, яугир-интернационалист, әлеге көндә Таулыҡайҙа йәшәй. Өлкән апайым Әлифә лә шул ауылда тора. Уның да кесе улы Артур Чечня һуғышында ҡатнашты, хәрби хәрәкәттәр ветераны.

Әмин ауылында йәшәүсе Зәлифә һеңлемдең ире Мәхмүтйән кейәү ҙә локаль һуғыш ветераны, ул Афғанстанда интерациональ бурысын үтәгән.

Әле Украинала махсус хәрби операция бара.

Бында ла беҙҙең туғандар ҡатнаша. Баймаҡ ҡалаһынан һеңлем Динәнең ире Ғәлинур кейәү бар. Төмән ҡалаһында йәшәгән Мансура апайымдың Тимур улы, ҡыҙының ире һәм уларҙың улы алғы һыҙыҡта йөрөй.

Махсус хәрби операцияла тиҙерәк еңеү яуланып барлыҡ ир-егеттәрҙең тыуған яҡҡа имен-һау әйләнеп ҡайтыуҙарын теләйбеҙ. Һуғыш бөтһөн, барыбыҙға ла тик тыныслыҡ кәрәк.

Рәйсә Мәхийәнова.

Баймаҡ районы, 1-се Төркмән ауылы.