Завод эш башланы

Хәйбулла районы үҙәге Аҡъярҙа күсмә бетон заводының (БРУ) сафҡа инеүе—район иҡтисады һәм төҙөлөш тармағы өсөн мөһим ваҡиға. Был предприятие инде үҙ продукцияһын сығара башланы, һәм ул шәхси башланғыстың төбәк инфраструктураһын нисек үҙгәртә алыуына яҡшы миҫал булып тора. Проектты уңышлы тормошҡа ашырыу—урындағы эшҡыуар Радик Булатовтың хеҙмәте. Уның идеяһы—бизнес менән властың һөҙөмтәле хеҙмәттәшлегенең күрһәткесе.

Инвестиция проекты «Һөҙөмтәле һәм конкурентлы иҡтисад» милли проекты сиктәрендә «Эшҡыуарлыҡ сәғәте» ултырышында ентекле тикшерелде. Эшҡыуарға комплекслы ярҙам күрһәтелде: ер участкаһын һайлауҙа һәм рәсмиләштереүҙә, кәрәкле коммуникацияларҙы тоташтырыуҙа булышлыҡ иттеләр. Ни бары ярты йыл эсендә заманса бетон-иретмә төйөнө төҙөлдө, хәҙер бында өс кеше эшләй. Етештерелгән продукцияның барыһы ла сертификацияланған, был уның сифатын һәм тармаҡ стандарттарына тап килеүен раҫлай.

Заводта әле түбәндәгеләрҙе етештерәләр: төрлө маркалағы товар бетоны; шлакоблоктар; тимер-бетон ҡулсалар; ФБС фундамент блоктары.

Хәйбулла районының булдыҡлы эшҡыуарына уңыштар теләйбеҙ. Әгәр һеҙ ҙә үҙ бизнесығыҙҙы асырға теләһәгеҙ һәм дәүләт ярҙамы саралары менән ҡыҙыҡһынаһығыҙ икән, урындағы хакимиәттә уҙғарылған «Эшҡыуарлыҡ сәғәте»ндә ҡатнашыу өсөн ғариза бирегеҙ. Быны Башҡортостан Республикаһының Инвестиция порталы аша эшләргә мөмкин: investrb.ru/ru.