Фельдшер уҡытыусы

Балалары ҙур ерҙә уҡып белем алһын өсөн Түәлбаевтар Һабырҙан район үҙәге Йылайырға күсеп сыға. Ғаилә башлығы Зиннәт Ғәлиулла улы сәнғәт кешеһе. Түәлбаевтарҙың балалары ла ата-әсәһенә оҡшап бик тырыш, эшһөйәр, әүҙем. Өлкәндәре мәктәпте, уҡыу йорттарын уңышлы тамамлап хәҙерге көндә үҙ һөнәрҙәре буйынса эшләп йөрөй. Зиннур улдары энергетика өлкәһе белгесе булһа, Зиниәләре Өфө дауаханаларының береһендә табип-терапевт. Уларҙан ҡала килгән ике балалары юғары уҡыу йорто студенттары. Кинйә ҡыҙҙары әле мәктәптә уҡый. Зиннур уҡыусы сағында «Урал батыр» эпосын яттан һөйләү буйынса республика конкурсында ҡатнашып, призлы урын яулай. Зиниә бәләкәй фәндәр академияһы еңеүсеһе була. Түәлбаевтарҙың уңыштарын һанай китһәң, аҡ ҡағыҙ биттәре етмәҫ. Һәр уңыш башында, әлбиттә, әсәйҙәре Зөлфиә Дамир ҡыҙының тырышлығы ята.

Зөлфиә Түәлбаева Йылайыр ауылының башҡорт гимназияһында биология фәненән уҡыусыларға белем биреп кенә ҡалмай, мәктәп урмансылығын да етәкләй. Былтыр уның уҡыусыһы Ульяна Мамыкина Хабаровскиҙа үткән «Профессионалдар» һөнәри оҫталыҡ буйынса Бөтә Рәсәй чемпионатының «Урманды файҙаланыу һәм уны тергеҙеү. Юниорҙар» компетенцияһында 2-се урын яулай. Уҡытыусы уҡыусылары менән "Экологик именлек" милли проектына ярашлы уҙғарылған «Урманды һаҡлайыҡ» Бөтә Рәсәй акцияһына йыл да әүҙем ҡушыла.

Зөлфиә Дамир ҡыҙы уҡытыусылар араһында ойошторолған район, республика кимәлендәге ярыш, конкурстарҙа бик теләп ҡатнаша. Быйыл да районда үткән «Йыл уҡытыусыһы-2025» конкурсында лауреат булып танылған. Уҡытыусы йәштәрҙең остазы ла. Йәш педагогтарға проект һәм тикшереү эштәре яҙырға өйрәтә, грант конкурстарында ҡатнашыу өсөн кәрәкле документтар тултырыша. Кешелекле, кеселекле, хәстәрлекле, ярҙамсыл булғаны өсөн уны коллегалары профком рәйесе итеп һайлап бер ҙә яңылышмаған. Ата-әсәләр ҙә педагогтан уңыуҙарын йәшермәй. Уҡыусылары иһә Зөлфиә Дамир ҡыҙының ауыҙына ғына ҡарап тора. Ҡыҙыҡлы теманы үткәреп ебәреп ҡуймайыҡ тип биология дәресен ҡалдырмаҫҡа тырышалар. Биология уҡытыусыһы менән берлектә гимназия яны биләмәһендә еләк, йәшелсә-емештең, ағас-ҡыуаҡтарҙың ниндәйен генә үҫтермәйҙәр! Бында беҙҙең яҡ өсөн ят үҫемлектәрҙе лә осратырға мөмкин. Зөлфиә Дамир ҡыҙы балаларға үҙ фәненән белем биреп кенә ҡалмай, тормошта үҙ юлыңды табырға, һынау, ҡаршылыҡтар алдында баш эймәҫкә, ныҡ булырға ла өйрәтә.

Гөлдәр Ҡадаева.

фото уҡытыусының шәхси архивынан