+24 °С
Ямғыр
Милли проекттар
23 Ғинуар 2025, 08:45
Урғаҙаға һыу килә
Баймаҡ районының Урғаҙа ауылын эсәр һыу менән тәьмин итеү йыл һайын киҫкен тора. Йәйҙең эҫе көндәре башланыу менән кешеләр баҡсаларына һыу һибә башлаһа, һыу торбаларында баҫым кәмей һәм бөтә ҡулланыусыларға ла һыу барып етмәй. Мәсьәләне ыңғай хәл итеү өсөн Башҡортостан Хөкүмәте Урғаҙа ауылын һыу менән тәьмин итеү тураһында ҡарар ҡабул итә. Төҙөлөш-монтажлау эштәре 2024 йылда "Экология" милли проектына ярашлы башлана. 20 йылдан ашыу эсәр һыу юҡлығынан ыҙа сиккән Урғаҙа ауылында әлеге көндә һыу тәьминәте селтәре төҙөлә. Атап әйткәндә, ауыл эсендә лә, һыу инешенән Урғаҙаға ҡәҙәр һыу торбалары һуҙыла.
Урғаҙаға һыу килә
Проектҡа ярашлы, яңы ер аҫты һыу үткәргесе үҙ эсенә бактерицидлы система павильонын, һыу баҫымы башняһын һәм икенсе күтәрелешле насос станцияһын, шулай уҡ ауыл урамдарына, инештән ауылға ҡәҙәр бөтәһе 23 саҡрым оҙонлоҡта һыу үткәргес һуҙыуҙы ала.
Ауыл урамдары араһында һалынасаҡ 7 саҡрым һыу үткәргестең бөгөнгө көндә 2,5 саҡырымына һыу селтәре һуҙылған да инде.
Подрядсы ойошмаһы эшселәре контрактҡа ярашлы 2025 йылдың йәй аҙағына ҡәҙәр иңенә алған бурысты тулыһынса үтәү йөкләмәһе алған.
