Мәҙәниәт усағы ремонтланасаҡ

Үткән аҙнала Башҡортостан Республикаһының мәҙәниәт министры Әминә Шафиҡова Урал аръяғына эш сәфәре менән килде. Әминә Ивний ҡыҙы Йылайыр районында иң беренселәрҙән булып Юлдыбай ауылындағы ғаилә мәҙәниәт үҙәген ҡараны. -Ауылдарҙа мәҙәниәт усаҡтары элек-электән төрлө быуын вәкилдәре осрашҡан, ғаилә менән барып булған үҙәк һанала. Шуға күрә, клубтарҙа, китапханаларҙа һәм музейҙарҙа йылы һәм йәмле булырға тейеш. Быйыл да мәҙәниәт учреждениеларын ремонтлауҙы һәм яңыртыуҙы дауам итәбеҙ,--тине республиканың мәҙәниәт министры Әминә Шафиҡова.-Һуңғы 5 йылда төбәктә «Мәҙәниәт» милли проектына ярашлы йылына 20 мәҙәниәт объектын яңыртыуға өлгәшәбеҙ. Быйылдан «Ғаилә» милли проектының «Ғаилә ҡиммәттәре һәм мәҙәниәт инфраструктураһы» яңы проектын тормошҡа ашыра башлайбыҙ. Уға ярашлы, тәүгеләрҙән булып Юлдыбайҙың ғаилә мәҙәниәт үҙәге бинаһына капиталь ремонт уҙғарасаҡбыҙ. Иң беренсе сиратта бинаның ҡыйығын ремонтларға кәрәк. Былтыр ҡыйыҡ оҙайлы ямғырҙарҙан һуң ныҡлы зыян күргән.

Мәҙәниәт усағы ремонтланасаҡ