Субсидия бүленәсәк

«Мәҙәниәт» милли проектының «Мәҙәни мөхит» төбәк проекты сиктәрендә 2019 йылда Башҡортостандың муниципаль берәмектәренә балалар сәнғәт мәктәптәре өсөн музыка ҡоралдары, ҡорамалдар һәм материалдар һатып алыуға республика ҡаҙнаһынан 11 миллион 250 мең һум күләмендә субсидия бүленгән. Тейешле бойороҡҡа Башҡортостан башлығы вазифаһын ваҡытлыса башҡарыусы Радий Хәбиров ҡул ҡуйҙы.

Субсидия алыусылар араһында – Әлшәй, Архангел, Балтас, Борай, Илеш, Ҡыйғы, Краснокама, Мәсетле, Мишкә, Тәтешле, Өфө, Учалы, Хәйбулла райондары, Ағиҙел, Нефтекама, Сибай ҡалалары.

2013 йылдан төбәктә был маҡсатҡа республика бюджетынан йыл һайын 12 миллион һумлап бүленә. Сәнғәт мәктәптәрен йыһазландырыу исемлегенә шулай уҡ һынлы һәм ҡулланма сәнғәт өсөн ҡорамалдар, мәҫәлән, мольберттар һәм керамиканы яндырыу өсөн мейестәр инә. Финанслау махсуслаштырылған учреждениеларға ҡиммәтле ҡорамалдар һатып алырға һәм белем биреү сифатын яҡшыртырға мөмкинлек бирә.

«Мәҙәниәт» милли проекты сиктәрендә быйыл 63 сәнғәт мәктәбе федераль бюджеттан бүленгән 22 миллион һумға илебеҙҙә етештерелгән «Николай Рубинштейн» маркалы пианино алған.

Башҡортостанда бөтәһе 117 балалар сәнғәт мәктәбе. 2020, 2022 һәм 2024 йылдарҙа Башҡортостан йыл һайын милли проект сиктәрендә сәнғәт мәктәптәрен музыка ҡоралдары менән йыһазландырыуға 76 миллион һум аласаҡ (бөтәһе 230,46 миллион һум). Был Рәсәй төбәктәренә бүленгән иң ҙур федераль субсидияларҙың береһе.

#нацпроекты