Бейеүсегә һүҙ әйтмәгеҙ

Сибай концерт-театр берекмәһенең «Сибай» халыҡ бейеүҙәре ансамбленең балет артисы, төбәк-ара, республика бейеү конкурстары лауреаты Илгизәр Йәнтүрин бала сағынан бейей. Ул Баймаҡ районының Түбәнге Иҙрис ауылында Гөлсәсәк һәм Айҙар Йәнтүриндарҙың 5 балалы ғаиләһендә тыуып үҫкән игеҙәктәрҙең һыңары. Илгизәр һәм Илзирә 2002 йылда тыуа. Ауыл мәктәбендә белем алған ваҡытта Рәсимә Халиҡова «Йәншишмә» балалар бейеү ансамбле ойоштора һәм Йәнтүриндар уның беренсе ҡарлуғастары була. Игеҙәктәр бергәләп «Зилалай», «Күл буйында осрашыу» бейеүҙәрен башҡара, ижади коллективтың оҫта бейеүселәре була.

29 апрель—Халыҡ-ара бейеү көнө

Илзирә 9-сы, Илгизәр иһә 10-сы класты бөткәс Сибай сәнғәт колледжының хореография бүлегенә уҡырға инә. Егет 3-сө курста уҡығанда Сибай концерт-театр берекмәһенең «Сибай» халыҡ бейеүҙәре ансамбленә саҡырыу ала һәм ошо көнгәсә тәүге эш башлаған сәхнәһендә бейей. Һыңары Илзирә лә ошо сәхнәлә ҡанат нығыта. Егет 4 йыл эшләү дәүерендә Ҡаҙағстанда, Мәскәүҙә, Санкт-Петербург һәм башҡа ҙур ҡалаларҙа гастролдәрҙә булған.

-Эшемде яратам. Сибай концерт-театр берекмәһе, ансамбль етәкселеге уңайлы эш шарттары тыуҙырыу, яңы бейеүҙәр һалыуға, сәхнә кейеме тектереү өсөн бар тырышлығын һала. Коллективыбыҙ татыу, эшсән,--ти Илгизәр.

Төп эшенән тыш, балет артисы үҙе уҡыған Сибай сәнғәт колледжында «Етегән», филармонияла «Ынйыҡай» бейеү ансамблдәре репетиторы булып та эшләй. Ситтән тороп Аҡмулла исемендәге Башҡорт дәүләт педагогия институтында етәксе-хореограф бүлегендә белем ала.

Гөлдәр Ҡадаева.