-Сибайҙа “Ҡайынҡай” балалар баҡсаһына йөрөнөм. Шунда йәш кенә музыкаль етәксебеҙ Рафаэль Әкрәм улының баянда оҫта уйнауына ғашиҡ булдым һәм мин дә шулай баянда уйнарға өйрәнергә тейешмен тигән маҡсат ҡуйҙым”,-- ти Зөлфиә Мөнир ҡыҙы.-Артабан музыка мәктәбендә был музыкаль инструментта уйнарға Марс Ваһап улы өйрәтте. Ирем Раушандың да төп һөнәре аккордеонсы, гитара буйынса квалификация үтеп, әле ҡыҙҙар-малайҙарҙы ошо инструментта уйнау серҙәренә төшөндөрә. "Мәҙәниәт" милли проектына ярашлы төрлә мәҙәни саралар ойошторалар.
Зөлфиә Мөнир ҡыҙының атаһы Әбйәлил яҡтарынан булған Мөнир Илһамов башҡорт халыҡ йырҙарын оҫта башҡара. Әсәһе Кинйәбикә Ирмөхәмәт ҡыҙы ла йыр-моңға маһир була. Ата-әсәһенең музыкаль белеме булмаһа ла улар балаларында кес кенәнән халҡыбыҙ моңона, йырҙарына һөйөү тәрбиәләй. Музыкаға мөкиббән ғашиҡ Зөлфиә Мөнир ҡыҙының хеҙмәт кенәгәһендә ике генә яҙыу: Үрге Ҡыйғы музыка һәм Сибай сәнғәт мәктәбенең баян класы уҡытыусыһы. Раушан Нариман улы иһә ҡалабыҙҙың бер нисә мәҙәниәт усағында эшләй. Сибай филармонияһы оркестрында, БДУ-ның Сибай институтында тәжрибә туплай.
Ул йырҙар ижад итеү, көй сығарыу, аранжировкалар яһау менән булыша.
Раушан Нариман улы менән Зөлфиә Мөнир ҡыҙы Хөснитдиновтар 35 йыл бергә татыу ғүмер итеүе менән дә күптәргә өлгө. Улар бер ул һәм бер ҡыҙға ғүмер бүләк иткән. Балалары музыкаль һәләтле булһа ла, икеһе лә техник һөнәр һайлай. Ҡыҙғанысҡа ҡаршы, ауыр ҡайғы ла күрергә тура килә уларға: улдары йәшләй баҡыйлыҡҡа күскән. Ҡыҙҙары кейәүҙә, Ижевск ҡалаһында йәшәй. Тормоштарының йәме, тәме, ҡото булып ике ейәндәре үҫеп килә.
-Музыка, мәҙәниәтһеҙ үеҙебеҙҙе күҙ алдына килтерә лә алмайбыҙ. Сәнғәткә һөйөү беҙҙе табыштырҙы, ҡауыштырҙы, тормош һыунауҙарын лайыҡлы үткәреп ебәрергә ярҙам итте. Бер-береңде тыңлап, ишетеп, аңлап, мин-минлегеңде артҡа ҡуйып, түҙеп йәшәргә кәрәк,--тип бергә оҙаҡ йылдар парлы ғүмер итеүҙең серҙәре менән бүлеште Зөлфиә Мөнир ҡыҙы.