Яугирҙәрҙең яҡындары ярышты

Баймаҡ районы Түбә ауылында «Әйҙәгеҙ, ҡыҙҙар! Киреһенсә!» исемле бик матур сара үтте. Уны ауылдың мәҙәни ойоштороусыһы З.Х.Үтәбаева Һәм ауыл китапханаһы китапханасыһы Г.М.Дилмөхәмәтова уҙғарҙы. Ярышҡа МХО яугирҙәренең әсәләре, ҡатындары һәм туғандары саҡырылды. Конкурста ике команда—Түбә һәм Мерәҫ ауылы командаһы ҡатнашты. Уйын ҡыҙыҡлы бара: ҡатын-ҡыҙҙар беренсе медицина ярҙамы күрһәтә, сөй ҡата, тиҙлеккә ит үткәргесте йыя һәм һүтә, йырлай һәм бейей.

Сараны «Өй йәме», «Рябинушка» ансамблдәре, мәктәп уҡыусылары, балалар баҡсаһы тәрбиәләнеүселәре йыр-бейеү менән биҙәй.

Яугирҙәрҙең яҡындары ярышҡан ярышта бер еңеүсе булмай, улар барыһы ла еңеүсе! Конкурста ҡатнашыусыларға Түбә ауыл советының Рәхмәт хаттары, иҫтәлекле бүләктәр тапшырылды. Ҡунаҡтар ҙа бүләкһеҙ килмәгән ине, ойоштороусыларға рәхмәт белдерҙеләр.

Сара һуңында Түбә ауыл биләмәһе башлығы Ә.Хәлитова сығыш яһаны, яугирҙәрҙең яҡындарын 8 март менән ҡотланы, әлеге сарала Мерәҫ командаһына ярҙам иткән ауыл депутаты Кәрим Ситдыҡовҡа рәхмәт белдерҙе.

Аҙаҡ иһә барыһы ла мәсеттә ойошторолған ифтарға барҙы.

Автор:Резеда Валиева

Читайте нас

Новости партнеров