Бөтә яңылыҡтар
Конкурстар
17 Ғинуар 2021, 21:40

"ЙЫР - ТОЛПАРЫМ" конкурсына саҡырабыҙ!

Баймаҡ районы Билал ауылы китапханаһы "Йыр - толпарым" исемле йырлы - моңло шәп конкурс иғлан итә! Унда һәр теләүсе ҡатнаша ала. Тулыраҡ мәғлүмәт сайтта.

Баймаҡ районы Билал ауыл китапханаһы йыл да төрлө проект менән эшләй. Акциялар, эстафеталар, бәйгеләрҙә ауылдаштар ғына түгел, икенсе ауыл, райондан да кешеләр әүҙем ҡатнаша. Быйылғы йыл да бик күп мәҙәни сараларға бай буласаҡ. Ни өсөн киләһе бәйге тап ошо исем аҫтында үтә һуң?

Был донъя ғәжәп бит ул. Кешеләр донъяға бер-береһенә оҡшаш сифаттар менән тыуа. Таланттары ла, йәшәү шарттары ла бер төрлөрәк, әммә араларында айырым һәләткә эйә булғандары ла бихисап. Берәүҙәр - шиғыр, икенселәр көй яҙа, өсөнсөләр һүрәт төшөрә, кемдер бейеүгә маһир, бәғзеләр үҙәгеңде өҙөр моң ижад итерлек һәләткә эйә. Һүҙем Күгиҙел ауылында йәшәүсе һәүәҫкәр композитор, Б.Вәлид исемендәге премия лауреаты, йөҙҙән ашыу йырҙар авторы Вилүр Шәкирйән улы Мәүлитов хаҡында.

Уның репертуары бик бай. Бигерәк тә ул тыуған төбәк, мөхәббәт, патриотик рух менән һуғарылған йырҙар ижад итә. Йөрәктән сыҡҡан йөрәккә етә, тиҙәр. “Йөрәгемдә, күңелемдә генә һаҡлап ҡалғым килмәй йырҙарымды, уларҙы йыр-моң һөйөүселәргә еткергем килә. Беҙҙең халыҡ йыр-моңға ғашиҡ бит ул”, – ти Вилүр ағай. Эйе, хаҡ һүҙҙәр, Вилүр ағай! Март айында үҙенең 70 йәшлек олпат юбилейын билдәләүсе һәүәҫкәр композитор Вилүр Шәкирйән улы Мәүлитовтың йырҙарын кесеһе генә түгел, олоһо ла яратып башҡара. Билал ауыл китапханаһы иғлан иткән "Йыр - толпарым" бәйгеһен башлайбыҙ! Йыр - моңға ғашиҡ дуҫтар, шәп бәйге һеҙҙең өсөн. Бәйгеселәрҙең араһынан иң - иңдәренә Вилүр Шәкирйән улы март айында үҙенең бүләген тапшырасаҡ. Башлайбыҙмы? Хәйерле сәғәттә! Билал ауыл китапханаһы төркөмөнә ҡушылырға, дуҫтарығыҙға һөйләргә, #йыртолпарым хэштеген ҡуйып, Вилүр Шәкирйән улы Мәүлитовтың йырҙарын йырлап, видеоларҙы китапхана төркөмөнә ебәрергә. Әйҙәгеҙ, башланыҡ, матур - матур йырҙар көтәбеҙ! Бәйгелә кесеһе лә, олоһо ла берҙәй ҡатнаша ала.
Райхана Булатова, китапханасы.
Баймаҡ районы Билал ауылы.