Сибайҙа берҙән-бер ветеранды ҡотланылар!

Бөгөн Сибай концерт-театр берекмәһе артистары ҡалабыҙҙа йәшәүсе берҙән-бер Бөйөк Ватан һуғышы ветераны Сәмиғә Рысмөхәмәт ҡыҙы Рысбаеваны Еңеү көнө менән ҡотланы.Сәмиғә Рысмөхәмәт ҡыҙы йәшәгән йорт алдында бай йөкмәткеле байрам концерты менән сығыш яһап, йыр-моң бүләк иттеләр.

Сибай ҡалаһында йәшәүсе берҙән-бер Бөйөк Ватан һуғышы ҡатнашыусыһы, декабрҙә 100 йәшен тултырған Сәмиғә Рысмөхәмәт ҡыҙы Рысбаева быйыл еңеүҙең 78 йыллығын билдәләй.

Ул 18 йәшендә фронтҡа эләгә һәм авиамеханик һәм парашют һалыусы булып хеҙмәт итә. Иң сағыу хәтирә – Чехословакияла Еңеү көнөн ҡаршылау булды, ти ул. Һуғыштан һуң Сәмиғә Рысмөхәмәт ҡыҙы заводта һәм рудникта эшләүен дауам итә. Уға II дәрәжә Ватан һуғышы ордены, «Германияны еңгән өсөн», «Хәрби ҡаҙаныштары өсөн»миҙалдары тапшырылған. Оло йәштә булыуына ҡарамаҫтан, Сәмиғә Рысмөхәмәт ҡыҙы әле лә яҡындарын ҡыуандыра.

Уға ныҡлы һаулыҡ һәм именлек теләйбеҙ.

Сибайҙа берҙән-бер ветеранды ҡотланылар!

Автор:Гульдар Кадаева