+30 °С
Болотло
Көнүҙәк мәсьәлә
7 Август 2025, 06:30
Сибайҙың белем усаҡтары яңы уҡыу йылына әҙер
Сибай ҡалаһының мәғариф, мәҙәниәт, өҫтәмә белем биреү учреждениеларының яңы уҡыу йылына әҙерлеген махсус комиссия тикшерә. Әйтергә кәрәк, барлыҡ белем усаҡтары, балалар баҡсалары белем байрамын ҡаршылауға яуаплы ҡараған. Уҡыусылар һәм ата-әсәләр мәктәпкә яйлап әҙерләнә башланы. Ҡаланың мәғариф, мәҙәниәт, йәштәр, спорт, социаль учреждение, урта һәм юғары уҡыу йорттарын яңы уҡыу йылына әҙерлеге етди тикшерелә. Август айы ғөмүмән был өлкәләрҙә эшләүселәр өсөн мәшәҡәтле, шул уҡ ваҡытта күңелле лә осор. Социаль өлкә учреждениеларының яңы уҡыу йылына әҙерлеген махсус комиссия йөрөп ҡарай һәм ҡабул итә. Улар белем усағының техник торошон, мәктәп, балалар баҡсаһы, уҡыу йорто яны биләмәләренең таҙалығын, хәүефһеҙлек сараларының үтәлешен дә ентекле тикшерә.
Сибайҙың белем усаҡтары яңы уҡыу йылына әҙер
Әйтергә кәрәк, белем усаҡтары яңы уҡыу йылына ентекле әҙерләнгән. Һәр ҡайһыһы биләмәләрҙе яҡшыртыуға, баҡсаны күркәмләүгә ҙур тырышлыҡ һалған. Түтәлдәрҙәге сәскәләргә тиклем сағыу биҙәлешле, хатта уларҙан тематик яҙыуҙар ҙа яһағандар. Ҡайһы берҙәрендә хәрби тематикалы биләмәләр ҙә булдырылған. Матурлыҡ матурлыҡ менән, хәүефһеҙлек саралары күреүҙе лә комиссия күҙ уңынан ысҡындарманы.
Уҡытыусылар һәм тәрбиәселер әйтеүенсә, яңы уҡыу йылына әҙерлек йәй буйы алып барылған. Биналарҙа ремонт эштәре атҡарылған, уҡыу кабинеттары рәткә килтерелгән. Баҡсаларҙа гөлгә күмелеп ултырһын өсөн хеҙмәткәрҙәр иртәнсәктән кискә тиклем тир түккән.
Яңы уҡыу йылына әҙерлекте байҡау юҡҡа ғына августың тәүге 10 көнөндә уҙғарылмай. Етешһеҙлектәр асыҡтанған осраҡта уларҙы бөтөрөүгә ваҡыт етерлек булыуы, йәғни 1 сентябргә ҡәҙәр етмәгән урынды еренә еткереп ҡуйыу мөмкинлеге бирелә.
