Яугирҙәргә ярҙам итеү зарур

2025 йылда хәрби хәрәкәттәр зонаһында яраланған МХО ветерандарына спорт залдарында һәм секцияларҙа бушлай шөғөлләнеү өсөн 10 мең һумлыҡ сертификаттар биреләсәк. Ярҙам сараһы физик тәрбиә һәм һаулыҡ һаҡлау хеҙмәттәре буйынса социаль заказға индереләсәк. Был хаҡта бөгөн Башҡортостан Башлығы Радий Хәбиров БР Дәүләт Йыйылышы – Ҡоролтайға Мөрәжәғәтнамәһендә белдерҙе. Республика етәксеһе спорт министрлығына ярҙам сараһын булдырыу буйынса документтар әҙерләргә ҡушты.

– Беҙ адаптив спортҡа, махсус хәрби хәрәкәттәр ветерандарын спорт аша реабилитациялауға айырым иғтибар бүләбеҙ. «Батырлыҡ» проектына ярашлы төҙөлгән республика йыйылма командаһы МХО ветерандарының «Беҙҙең заман геройҙары» төбәк-ара ярыштарында уңышлы сығыш яһаны. Беҙҙең команда Ватанды һаҡлаусылар кубогында ла ҡатнашты. Рәсми булмаған миҙалдар турнирында Башҡортостан командаһы Волга буйы һәм Урал федераль округтарының МХО ветерандары араһында беренсе урын яуланы», — тине Радий Хәбиров.

Был ҡарарға ҡарата Башҡортостандың атҡаҙанған ауыл хужалығы хеҙмәткәре, йәмәғәт хәбәрсеһе Ирек Бикмәтов үҙ фекерен белдерҙе:

—Беҙҙең илебеҙҙе электән тарҡатырға теләйҙәр. Ил башлығы В.В.Путин ошоға юл ҡуймай килә. Шуға ла әлеге хәрби операция килеп сыҡты. Бөгөн Ватан сиген, ил именлеген һаҡлаусы, яҡлаусыларға ихтирамлы ҡараш булырға тейеш. Был тәңгәлдә республикабыҙҙа күп эштәр башҡарыла. Башҡортостан Башлығы Радий Хәбиров БР Дәүләт Йыйылышы—Ҡоролтайға мөрәжәғәтнамәһендә был темаға айырым туҡталды. Был , әлбиттә, дөрөҫ йүнәлеш.