Ирекмәндәргә рәхмәт!

Үҙаллы изоляция режимы индерелгәс тә Сибайҙа “Беҙ бергә!” ирекмәндәр штабы эшләй башланы. Ирекмәндәр сафында ҡаланың мәҙәниәт бүлеге хеҙмәткәрҙәре лә бар. Улар көн һайын мохтаждарға аҙыҡ-түлек, дарыуҙар алып бара, торлаҡ-коммуналь квитанцияларын түләүҙә ярҙам күрһәтә. Бынан тыш, өлкән быуын вәкилдәренә психологик яҡтан да ярҙам итәләр, хәлдәрен белешеп, коронавирусҡа бәйле илдәге хәл тиҙҙән тотороҡланасағын аңлаталар.

--Ирекмәндәргә ҙур рәхмәт! Үҙ сәләмәтлектәрен хәүеф аҫтына ҡуйып, ололарҙы хәстәрләүҙәре бик хуп! Аҙыҡ-түлек, дарыуҙар алып килеп кенә торалар, тышҡа сыҡмаҫҡа ҡушалар,--ти Миңнур Дилмөхәмәтова.—Мин һуғыш осоро балаһымын. Бөйөк Ватан һуғышы ветерандары кеүек беҙҙең саф та аҙайҙы хәҙер. Ҡала етәкселегенә ҙур рәхмәт, беҙҙе хәстәренән бер ваҡытта ла айырмай.