-13 °С
Болотло
Бөтә яңылыҡтар
Күңел түренән
11 Июнь 2025, 10:15
Атайым Сибайҙы төҙөгән
12 июндә Сибай ҡалаһында йәшәүсе ҡәҙерле атайым Сәйетҡолов Фәрғәт Зиннур улына 85 йәш тула. Иҫемдә, бәләкәй саҡта, уның эшенә ашҡынып, йүгереп бара инем. Ҡаланың «Башмедьстрой» тресы урынлашҡан бинаны иҫләйһегеҙме? Ул ваҡытта был предприятие ҡалала ғына түгел, Урал аръяғында ла гөрләп эшләп торҙо. Атайым әле лә беҙ ҡаланы төҙөнөк, тип йыш ҡабатлай. Ваҡытында треста 4 мең кеше эшләгән. Уның составына 22 ойошма ҡараған. Ҡеүәтле төҙөлөш ойошмаһында социаль тормош та ҡайнай. «Орленок» балалар лагеры ғына үҙе ни торҙо! 5 корпоратив балалар баҡсаһы эшләне. «Строитель» клубында мәҙәни тормош гөрләне. Һәр йыл августа Төҙөүселәр көнө һабантуй шикелле итеп ойошторолдо. Атайым «Башмедьстрой» предприятиеһы профсоюз комитетының алыштырғыһыҙ рәйсе булды. Тресҡа бағышлаған 35 йыл ғүмеренең 24 йылын профсоюз лидеры булып эшләне.
Атайым Сибайҙы төҙөгән
Ул профсоюз етәксеһе булған осорҙа «Орленок» лагерында бөтәһе 72 заезд ойошторола. Һәр заезда 250-шәр бала ял иткәндә лә атайым эшләгән осорҙа 18 мең баланы йәйге ял менән тәьмин иткән. Цифрҙар теле менән әйткәндә уның эшенең күләме ап-асыҡ күҙ алдына килә.
Бөтәһе өсөн дә ул ихтирамлы, ғәҙел һәм мега-яуаплы Фәрғәт Зиннур улы. Беҙҙең өсөн ул –атай. Беҙ--балалары уны шулай атайбыҙ. Атай—ул тимәк ғаилә тотҡаһы. Беҙҙең авторитет. Сикһеҙ яратҡан кешебеҙ. Һәм уның ҙур, йылы йөрәгендә бөтәбеҙгә лә урын етерлек.
Улар әсәйем – мәғариф ветераны, сәсәниә Ғәлимә Мөхәмәтхәбиб ҡыҙы Әхмәтова менән бер көндө – 12 июндә тыуған. Тик йәш араларында бер йыл айырма бар. Уларҙың үҙ-ара мөнәсәбәте лә беҙҙең өсөн оло үрнәк.
Былтыр мин атайыма: «Һин кәмендә 100 йәшкә ҡәҙәр йәшәргә тейешһең»,--тинем.
Сөнки минең өсөн көндә шылтыратып: «Һаумы, ҡыҙым!»--тигән яғымлы һүҙҙәрен ишетеү был тормошта иң мөһиме.
Тыуған көнөң, юбилейың менән, атай! Әйҙә һине барса ҡала халҡы ҡотлаһын! Сибайҙы бит һеҙ төҙөнөгөҙ.
Зөһрә Сәйетҡолова Башҡортостандың атҡаҙанған мәғлүмәт һәм киң мәғлүмәт саралары хеҙмәткәре
фото Сәйетҡоловтарҙың шәхси архивынан
Новости партнеров