Беҙҙең Зарина--еңеүсе!

Сибай ҡыҙы Зарина Исламова Таиландта тай боксы буйынса турнирҙа Sanehjan менән алышта ышаныслы еңеү яуланы. Әйткәндәй, яҡташыбыҙ рингҡа башҡорт бүреген кейеп сыҡҡан. Ҡыҙ алышҡа башҡорт бүреген һәм әсәһе үҙ ҡулдары менән яһаған түшелдеректе тағып сыҡҡан. Шул рәүешле Зарина башҡорт милләтен, милли кейемен донъяға таныта. -Был образ минең өсөн көс һәм наҙлылыҡты, ышаныс һәм ихтыяр көсөн сағылдыра. Был--традицияларҙы бутау түгел, минең күңелемдә йәшәүсе ир-егет һәм ҡатын-ҡыҙ башланғыстарының гармонияһын күрһәтеү. Бала саҡтан алып малйҙар донъяһына, спортҡа, физик көскә күберәк тартылдым. Әммә минең күңелемдә шулай уҡ нәфислек, йомшаҡлыҡ, матурлыҡ та бар. Был образда миңә иң оҡшағаны--өләсәйем эшләгән башҡорт ҡатын-ҡыҙҙары биҙәүесе--селтәр. Ул уны ҡот өсөн һәм бирнә итеп үҙ ҡулдары менән яһаған. Уны кейгәндә, мин өләсәйемдең ҡулдарының йылыһын, көсөн, тыуған ерем менән бәйләнеште тоям. Был минең өсөн биҙәүес кенә түгел--хәтер, тамырҙарымды онотмау ҙа. Башҡортостандан булыуыма менән ныҡ ҡыуанам. Иҫ киткес хозур тыуған еремде бөтә донъяға танытҡым килә: беҙҙең үҙ ғөрөф-ғәҙәттәребеҙ, милли кейемдәребеҙ, мәҙәниәтебеҙ бар, беҙ уларҙы хөрмәт итәбеҙ һәм ғорурланабыҙ.

Зарина Исламова бәләкәй сағынан уҡ «Ҡара аждаһа» клубында көнсығыш һуғыш төрҙәре менән шөғөлләнә һәм баштан үҙен маҡсатҡа ынтылыусан спортсы итеп таныта. Ул кикбоксинг һәм тай боксы буйынса Башҡортостан, Рәсәй чемпионкаһы, төбәк-ара ярыштарҙа бик күп миҙалдар яулауы менән дә алдыра.

Иң ҙур ҡаҙаныштарының береһе—2024 йылда Грецияла уҙған U23 донъя чемпионатында алтын миҙал яулауы. Унан һуң Таиландтың Раджадамнерн легендар стадионында көслө дәғүәселәрен еңеп, халыҡ-ара титулға өлгәште. Бангкоктағы һуңғы еңеүе лә уның ныҡышмал хеҙмәте емеше. "Йәштәр һәм балалар" милли проекты сиктәрендә уҙғарылған ярыштарҙа гел алдынғы урындар биләй.

Сибай йәштәре уның уңыштарын күҙәтеп бара һәм һәр яҡлап уға оҡшарға тырыша. Социаль селтәрҙәге сәхифәһендә Зарина тренеры Руслан Кривушаға, командаһына, партнерҙарына, турнирҙы ойоштороусыларға, «Ҡара аждаһа» клубы, Сибай балалар һәм үҫмерҙәр спорт мәктәбе етәкселегенә, тренеры Александр Гавриловҡа, миңә ышанған һәр кемгә рәхмәт белдерәм!—тип яҙҙы ҡыҙ. -Бангкоктың иң шәп стадиондары рингына күтәрелеү минең өсөн оло мәртәбә. Һәр алышым теләһә ҡайһы дәғүәсегә ҡаршы тороуға әҙерлек мәктәбе. Тыуған ҡаламды, республикамды, илемде халыҡ-ара аренала танытыуыма ифрат шатмын.

Гөлдәр Ҡадаева.

Фото Зарина Исламованың шәхси архивынан.

Автор:Гульдар Кадаева

Читайте нас

Партнеры