Ҡотлайбыҙ!

Эльвира Солтанғолова—Баймаҡ ҡыҙы. Баш ҡалабыҙҙа милли ризыҡтар менән сауҙа итеүсе Эльвира хаҡында бынан бер нисә йыл элек беҙҙең гәзиттә мәҡәлә лә донъя күргәйне. Урал аръяғында етештерелгән талҡан, ҡымыҙ, эремсек, ҡорот, һалма, туҙ һағыҙы һәм башҡаларын Өфө тарафында яратып ҡабул иттеләр.
Эльвираның тормошондағы ҡытыршылыҡтар хаҡында, уның яңғыҙ ике ул тәрбиәләүен, ауырлыҡтарҙы нисек йырып сығыуын да хәбәр иткәйнек мәҡәләлә. Ҡар өҫтөндә усаҡ яғыр характерға эйә ул.
Әле уның улдары үҫеп килә. Өлкәне Данис 15 йәшен дә тултырҙы, бәләкәйе Рамаҙанға—10 йәш. Тормошҡа ололар күҙлегенән ҡараған Данис тиҫтерҙәренән фекерләүе, донъяға ҡарашы менән айырылып та тора. Мәктәптә уҡыу менән бер рәттән мөмкин тиклем аҡса эшләргә, әсәһенә ярҙам итергә тырыша.
—Әсәй, беҙ бит ҙураябыҙ ҙа сығып китәбеҙ. Һиңә үҙ йәреңде табырға, кейәүгә сығырға кәрәк,—тип Данис һуңғы йылдарҙа әсәһен ныҡ ҡына өгөтләй башлай. Хатта бәхәс ҡора. «Мин әсәйемә йәр табып, кейәүгә бирһәм, ул миңә—500 мең һум, әгәр үҙе табып сыҡһа, мин уға 500 мең һум бирәм»,—тип Данис интернет киңлегенә видеояҙмала һала.

Ә Эльвира күптән түгел яҙмышын Әбйәлил егете менән бәйләне. Егет әлегә махсус хәрби операцияла. Ялға ҡайтҡанда ЗАГС-ҡа инеп, рәсми яҙылышып та ҡуйғандар.
—Улыма 500 мең һум бирә алмайым бит, шуға ҡурҡыштан кейәүгә сыға һалдым,—тип шаярта Эльвира.

Ысынында, улар 2020 йылдан таныштар.

--Ул шул 2020 йылда уҡ минән бишбармаҡ алам ти ине. Шунда уҡ һалманы түгел, үҙемде күҙ уңында тотҡанмы икән!? Сөнки мине "Бишбармаҡ" тип йөрөтәләр бит, әллә үҙемде алам тигәнме икән?--тип көлә Эльвира.--Айҙар маҡтансыҡ түгел, юҡ-бар, эшләй алмаҫтай эшен һөйләмәй. Әйтә икән--эшләй, һүҙендә тора белә. Махсус хәрби операцияға киткәнгә тиклем дуҫтарса аралаштыҡ, уның өсөн борсолдом, даими яҙыштыҡ, һөйләштек. Йәй буйы "Мин һине алам" тип яҙа ине, мин әһәмиәт бирмәнем, иң мөһиме имен-һау йөрөһөн, донъялар тынысланһын, тип теләй инем. Сираттағы ялына ҡайтҡанда "Беҙ ЗАГС-ҡа барабыҙ",--тип әйтте. Оҡшай инде ҡыйыу, үҙ-үҙенә ышанған егеттәр. Ризалаштым. Берәүгә лә әйтмәй генә яҙылдыҡ. Аҙаҡ, әлбиттә, атай-әсәйҙән әрләндек.

Эльвира һөйгәнен рухи яҡтан хупларға, ауыр саҡта ярҙам итергә әҙер. Айҙар ҙа ялға ҡайтҡанда Данис һәм Рамаҙан менән дуҫтарса аралаша, улар бергә ял итә, уртаҡ тел тапҡандар.
Имен-һау, бәхетле йәшәргә яҙһын, тип теләйбеҙ.