Мутлашыусылар үҙҙәрен социаль фонд хеҙмәткәре булып танытһа, ышанмағыҙ!

Яҙыҡ юл менән аҡса эшләргә теләүселәр Рәсәй халҡын алдауҙың яңы ысулын уйлап сығарып ҡына тора. Хәҙер улар ҡорбандарына шылтыратып, үҙҙәрен Социаль фонд хеҙмәткәре итеп таныштыра һәм хаҡлы ялға сыҡҡанда иҫәпкә алынмаған хеҙмәт стажы барлығын, шуға ярашлы пенсияны өҫтәтеп булыуын белгертә. Пенсия тигәс, әлбиттә, уларҙың мәкерле уйынан башлыса оло йәштәгеләр зыян күрә. Әгәр ҡорбандары уларҙың тоҙағына ҡапһа, мутлашыусылар телефондан ғариза биреүҙе һорай. Идентификация үтеү өсөн телефонға смс-хәбәр аша килгән кодты ебәреүҙе үтенәләр. Кодты белгәс тә яуыз уйлы әҙәмдәр ҡорбанының «Дәүләт хеҙмәттәре» порталындағы аккаунтына, йә иһә банк ҡушымтаһына инеп, аҡсаһын үҙләштерә. Шулай уҡ уның исеменә кредит та юллай.