Кеше үҙгәрмәй тиһәк тә

Ә бына “кеше үҙгәрмәй” тигән установка уңыш юлында алға ебәрмәй тотоп торған убеждениеларҙың береһе. Уңышҡа өлгәшер өсөн бит кешегә күберәк белергә, белем даирәһен арттырырға, яңылыҡҡа ынтылырға, тырышырға кәрәк. Элекке шаблондарҙан ҡотолоп, күнеккән рамкаларҙан сығып, яңы ғәҙәттәр булдырырға тура килә. Шуға ла, үҙгәреп булмай, тип һанаған кеше шәхес булараҡ үҫешеүгә блок ҡуя. Әммә тормош бер урында тормай. Ул һине барыбер үҙгәрештәргә этәрәсәк. Һәм, үҙең теләмәһәң, йә теләгең булып та ҡыл да ҡыбырлатмаһаң, йыш ҡына һинең теләгеңдән тыш башҡарыла. Бында мин үҙемде миҫалға килтерә алам. Мин үҙгәрергә, тормошома яңылыҡ индерергә тейешлегемде аңлай инем. Эштән хатта китеп тә ҡараным. Әммә, үҙемә ышанманыммы, кеше һүҙе нығыраҡ тәьҫир иттеме, ҡурҡыуҙарым ҡамасауланымы, кире барҙым. Оҙаҡ эшләй алмаясағымды тойған килеш. Ысынлап та, аңҡы-тиңке килеп йөрөй торғас, барыбер киттем. Хәҙер үҙемә электән оҡшаған психолог һөнәрен үҙләштерәм☺️

Башыңа нимәнелер үҙгәртеү тураһында уй килеп инде икән, әлеге йәшәү рәүешең менән риза түгелһең икән, ул юҡҡа түгел, тимәк, шулай яҡшыраҡ, дөрөҫөрәк, уңышлыраҡ. Тимәк, һин үҙеңә кәрәкле опытты алдың, инде артабан үҫешергә кәрәк. Эске тойғоңа ҡолаҡ һалмай, ҡурҡыуыңдан ҡотола алмай, һаман элекке ғәҙәттәргә, күнегелгән әйберҙәргә йәбешеп ятһаң, күңел тыныслығы юғаласаҡ. Үҙеңдән риза булмау көсәйәсәк, эшләгән эшеңдән, ҡылыҡ-фиғелеңдән, һөйләгән хәбәреңдән ҡәнәғәт булмаясаҡһың, туҡтауһыҙ йәнең көйәсәк, асыуыңды иреңә, балаларыңа төшөрә башлаясаҡһың, үҙеңде аҡлар өсөн башҡаларҙа ғәйеп эҙләйәсәкһең...

Һеҙгә бындай хәл танышмы? Әләгә мәлдә кем үҙен: "кеше үҙгәрмәй" тип ышандырырға тырыша?